BAKI,AzerVoice, Fərid Mikayılov

İran Xarici İşlər Nazirliyinin sözçüsü İsmyıl Bəqai ABŞ-ın Karib dənizi və Latın Amerikasındakı hərbi fəaliyyətlərinin beynəlxalq sülh və təhlükəsizlik üçün “təhlükəli nəticələrə” səbəb ola biləcəyi barədə xəbərdarlıq edib.

AzerVoice xəbər verir ki, Bəqai Venesuelanın suverenliyi və ərazi bütövlüyünə hörmət göstərilməsinin vacibliyini vurğulayıb.

O, Venesuelanın “qanuni və seçilmiş hökumətinə qarşı güc tətbiqi ilə hədələməni” beynəlxalq hüququn açıq şəkildə pozulması, həmçinin BMT Nizamnaməsinin, xüsusilə millətlərin öz müqəddəratını təyin etmə və gücdən istifadənin qadağan olunması ilə bağlı 2(4)-cü maddəsinin kobud şəkildə pozulması kimi dəyərləndirib.

Bəqai, beynəlxalq qurumların ABŞ-ın balıqçı qayıqlarına hücumlarını “ixtiyari və qeyri-qanuni qətllər” kimi təsvir edən çoxsaylı hesabatlarına istinad edərək, narkotiklərlə mübarizə bəhanəsi ilə Venesuelanın suverenliyinin pozulmasına son qoyulmasına çağırıb.

İran rəsmisi həmçinin BMT Baş katibi Antonio Quterreşin beynəlxalq sülh və təhlükəsizliyin pozulmasının qarşısını almaq və “aqressiv birtərəfliliyin genişlənməsinin qarşısını almaq” öhdəliyini yerinə yetirməyə çağırıb.