BAKI, AzerVoice, Orxan Qədirzadə
İsrail hökuməti Qətəri Qəzzaya maliyyə yardımı göstərməyə təşviq edib.
AzerVoice xəbər verir ki, İsrail hökumətinin 2020-ci ildə Qətərin Qəzzaya birbaşa maliyyə dəstəyi göstərməsini təşviq etdiyi və bu fəaliyyətini yüksək qiymətləndirdiyi sənəd üzə çıxıb.
Sənəddə bildirilir ki, Qətər hökuməti Qəzza Yenidənqurma Komitəsi və onun rəhbəri Məhəmməd əl-İmadi vasitəsilə bölgə əhalisinə maddi yardım göstərib, elektrik, infrastruktur, səhiyyə və yaşayış layihələrinə maliyyə dəstəyi verib.
Sənədin müəllifi, İsrailin Daxili Təhlükəsizlik Xidməti “ŞinBet”də və XİN-də çalışmış Ronen Levi olub. O, sənəddə Qəzzəyə birbaşa maliyyə axınının COVID-19 dövründə də davam etdiyini qeyd edib və iki ölkə arasındakı koordinasiyanın vacibliyini vurğulayıb.
Sənədin üzə çıxmasından sonra İsraildə “Oktyabr Konseyi” adlı ictimai təşəbbüs hökumətə istintaq komissiyasının yaradılması çağırışı edib. Qurumun bəyanatında bildirilib ki, “Netanyahu hökumətinin Qəzzəyə fon ötürən siyasəti araşdırılmalıdır.”
Netanyahu hökuməti, 7 oktyabr 2023-cü il hadisələrindən əvvəl Qətər vasitəsilə Qəzzəyə birbaşa nağd vəsait axınının təmin edilməsinə şərait yaratdığı üçün tənqid olunur.
Həmçinin Netanyahunun yaxın ətrafının Qətərdən maliyyə vəsaiti alması və həmin pulların seçki kampaniyasına yönləndirilməsi də iddia olunur.
İsrail mediası bu hadisəni “Katargate” adlandırır.
Bu iddialar nəticəsində İsrail Baş naziri Benyamin Netanyahunun sözçülərindən Eliezer Feldstein və müşavirləri Jonathan Urich ilə Srulik Einhorn təqsirləndirilən şəxs qismində məhkəmə qarşısına çıxıb, iş ŞinBet (İsrail təhlükəsizlik xidməti) tərəfindən araşdırılan cinayət işinə çevrilib.
Feldsteinin Qətərin imicini dəstəkləmək məqsədilə beynəlxalq bir şirkətdən maaş aldığı, Netanyahunun müşavirləri Urich və Einhornun isə Qətər üçün imic məsləhətçiliyi fəaliyyəti göstərdiyi bildirilib.
İsrailli iş adamı Gil Bilgerin Feldstein-ə pul göndərdiyini dediyi səs yazısı İsrail dövlət televiziyasında yayımlanıb, Feldstein isə Bilgerin iddiasının doğru olduğunu etiraf edib.
Feldstein və Netanyahunun iki müşaviri – Jonathan Urich və Srulik Einhorn – 31 martda həbs olunmasından sonra Netanyahu polisə şahid qismində ifadə verib.
“Katargate” qalmaqalı İsrail cəmiyyətində Netanyahu hökumətinin Qətərlə əlaqələrinin mahiyyəti və şəffaflığı barədə ciddi suallar doğurub. Analitiklər hesab edirlər ki, bu sənəd və ifşalar İsrailin Qəzzə siyasətində ikili yanaşmanı üzə çıxarır və Tel-Əvivin regiondakı diplomatik etibarlılığını sarsıdır.