BAKI, AzerVoice
Bu gün, İsrailin Qəzza zolağına qarşı davamlı hava hücumları nəticəsində azı 15 fələstinli həlak olub, bir çoxu isə yaralanıb.
AzerVoice xəbər verir ki, bu barədə Fələstin xəbər agentliyi "SAFA" məlumat yayıb.
Məlumata görə, öldürülənlərdən doqquzu Qəzza şəhərinin şimalı və şərqinə endirilən hücumlarda həyatını itirib.
Məlumatda həmçinin qeyd olunub ki, Qəzza zolağının cənubunda yerləşən Xan Yunis şəhərinin şərqində üç nəfərin cəsədi dağıntılar altından çıxarılıb. Eyni zamanda, Rəfah şəhərinin şimalında yerləşən "Əl-Şakuş" yardım mərkəzi yaxınlığında İsrail hərbçilərinin açdığı atəş nəticəsində iki fələstinli həlak olub, doqquz nəfər isə yaralanıb. Xan Yunisin cənub hissəsinə edilən bir başqa hücumda isə daha bir nəfər həlak olub.
Həmçinin bildirilib ki, İsrail ordusu Qəzza şəhərinin şərqində yerləşən Şücaiyyə məhəlləsində partlayıcı maddə ilə yüklənmiş robotu işə salaraq bir obyektə hücum təşkil edib.
