BAKI, AzerVoice

Avropa İttifaqı (Aİ) İsraillə Qəzza zolağına humanitar yardım çatdırılması barədə razılığa gəlib.

AzerVoice xəbər verir ki, bu barədə Aİ-nin Xarici Siyasət və Təhlükəsizlik üzrə Ali Nümayəndəsi Kaya Kallas bildirib.

Kallasın sözlərinə görə, bu razılaşma Qəzzaya humanitar yardımın çatdırılma imkanlarının genişləndirilməsini nəzərdə tutur.

"Razılaşma daha çox keçid məntəqəsinin açılmasını, yardım və ərzaq daşıyan yük maşınlarının bölgəyə girişini, həyati əhəmiyyətli infrastrukturun təmirini və humanitar yardım işçilərinin qorunmasını əhatə edir" - deyə, Kallas bildirib.

O əlavə edib ki, İsrailin razılaşdırılmış bütün tədbirləri dərhal tətbiq etməsi gözlənilir.

Aİ-nin Xarici Fəaliyyət Xidmətinin yaydığı əlavə bəyanatda bildirilib ki, gündəlik olaraq Qəzzaya daxil olan ərzaq və qeyri-ərzaq məhsulları ilə dolu yük maşınlarının sayının əhəmiyyətli dərəcədə artırılması, həm şimal, həm də cənub istiqamətində yeni keçid məntəqələrinin açılması, İordaniya və Misir vasitəsilə yardım yollarının yenidən istifadəyə verilməsi, təndirlər və aş evləri vasitəsilə qida paylanmasının təşkil olunması, yardım mərkəzləri üçün operativ səviyyədə yanacaq tədarükünün bərpası, yardım işçilərinin təhlükəsizliyinin təmin olunması, su təmizləmə qurğularına elektrik verilişinin bərpası və digər həyati əhəmiyyətli infrastrukturların təmiri planlaşdırılır.