BAKI, AzerVoice

Qvatemalada 3000 illik qədim Maya şəhərinin qalıqları tapılıb.

AzerVoice xəbər verir ki, Qvatemalanın Peten bölgəsində yerləşən sıx meşəlik ərazidə eramızdan əvvəl 800-500-cü illərə aid olan qədim Maya şəhərinin qalıqları aşkar edilib.

“Los Abuelos” (“Böyük Valideynlər”) adlandırılan bu arxeoloji tapıntı dövrün ən erkən mərasim və ictimai-siyasi mərkəzlərindən biri hesab olunur.

Qvatemala Mədəniyyət Nazirliyinin yaydığı açıqlamaya görə, 16 kvadrat kilometr sahəyə yayılan bu şəhərdə 33 metr hündürlüyündə piramida, unikal kanal sistemi, monumental tikililər və Preklassik dövrə aid divar rəsmləri üzə çıxarılıb. Ərazidə aşkarlanan və əcdadları simvolizə etdiyi deyilən iki insanabənzər heykəl şəhərə ad verən əsas detaldır.

Qazıntılar Qvatemala və Slovakiyadan olan arxeoloqlar tərəfindən aparılıb. Tədqiqatçılar bildirirlər ki, Los Abuelos və yaxınlıqdakı iki yaşayış məskəni birgə “naməlum şəhər üçbucağı” yaradır və bu tapıntılar Maya sivilizasiyasının erkən mərhələlərinə dair mövcud anlayışları dəyişə bilər.

Qeyd edək ki, bu kəşfdən əvvəl, aprel ayında Peten bölgəsində yerləşən Tikal şəhərində Meksikanın Teotihuacan mədəniyyətinə aid min illik qurbangah da tapılmışdı. Bu tapıntı iki qədim mədəniyyət arasında əlaqələrin olduğunu göstərmişdi.