BAKI,AzerVoice, Fərid Mikayılov

Braziliya futbolunun əfsanəvi simalarından biri olan Neymar diz əməliyyatından sonra rəsmi şəkildə bərpa prosesinə başlayıb.

AzerVoice xəbər verir ki, bu mərhələ onun 2026-cı il Dünya Çempionatı heyətinə düşmək yolunda ilk ciddi addım kimi qiymətləndirilir.

33 yaşlı hücumçu dekabrın 22-də sol dizindən əməliyyat keçirib. Qısa istirahət mərhələsindən sonra Neymar yanvarın 9-da doğma klubu Santosun məşq bazasında fiziki hazırlıq proqramına start verib. Klubun idman zalında məşq edən futbolçunun əhval-ruhiyyəsinin yüksək olduğu bildirilir.

Müşahidəçilərin sözlərinə görə, Neymarın hazırkı məşqləri əsasən dizin möhkəmləndirilməsinə yönəlib. Əməliyyat “kiçik” hesab edilsə də, futbolçunun karyerası baxımından onun əhəmiyyəti böyükdür. Fevralın 5-də 34 yaşını qeyd etməyə hazırlaşan ulduz futbolçu üçün hər gün bərpa prosesində həlledici rol oynayır.

Qeyd edək ki, Neymar əməliyyatı planlaşdırıldığından gec etdirib. O, mövsümün kritik mərhələsində Santosu tərk etməmək və komandanın yüksək liqada qalmasına kömək etmək məqsədilə sağlamlığını riskə atıb. Onun mövsümün son oyunlarındakı çıxışı klubun liqada mövqeyini qorumasında əsas amillərdən biri kimi dəyərləndirilir.