Foto: Reuters
BAKI, AzerVoice
İsrailin Baş naziri Binyamin Netanyahu, ABŞ Prezidenti Donald Trampın Yaxın Şərq üzrə xüsusi nümayəndəsi Stiv Uitkoffun Qəzza zolağındakı atəşkəslə bağlı təqdim etdiyi yeni təklifi qəbul edib.
AzerVoice xəbər verir ki, bu barədə Axios portalı məlumat verib.
Məlumata görə, təklif İsrailin xeyrinə dəyişdirildiyi üçün HƏMAS bu vəziyyətdən narazıdır. Yeni plan çərçivəsində ABŞ müvəqqəti atəşkəsin daimi sülhə çevriləcəyinə dair hər hansı zəmanət vermir.
HƏMAS, ABŞ-ın yeni atəşkəs təklifini vasitəçilər vasitəsilə təhvil aldığını bildirib. Hərəkatdan verilən yazılı açıqlamada qeyd olunub ki, sənəd HƏMAS-ın aidiyyəti orqanları tərəfindən diqqətlə araşdırılır.
“Verəcəyimiz cavab, Qəzzadakı Fələstin xalqının mənafeyini qorumağa, humanitar yardımın çatdırılmasına və daimi atəşkəsin təmin olunmasına xidmət edəcək” - deyə, HƏMAS-ın verdiyi açıqlamda bildirilib.
HƏMAS, bölgədə ədalətli və hərtərəfli həll üçün bütün konstruktiv təşəbbüslərə açıq olduğunu da vurğulayıb.
Uitkoff isə, Ağ Evdə keçirilən tədbir zamanı bildirib ki, yeni sənəd üzərində iş tamamlanmaq üzrədir və yaxın zamanda təqdim olunacaq.
“Prezident [Donald Tramp] bu gün sənədi nəzərdən keçirəcək. Mən müvəqqəti atəşkəsin və uzunmüddətli həllin əldə olunacağına, bu münaqişənin sülh yolu ilə həllinə inanıram” - deyə, o bildirib.
Xatırladaq ki, bir gün əvvəl HƏMAS da Uitkoff ilə Qəzzada atəşkəs üçün ümumi çərçivə üzərində razılığa gəldiklərini açıqlamışdı.
