BAKI, AzerVoice
Türkiyə Suriyaya enerji ixracına başlayır – Gözlənilən gəlir 1 milyard dollardan çox olacaq.
AzerVoice xəbər verir ki, Türkiyə
Suriyada həyatın normallaşdırılması və yenidənqurma prosesinə töhfə
olaraq bu ölkəyə elektrik və təbii qaz ixracına başlayacaq.
İxracatın üç ay ərzində həyata keçirilməsi və Türkiyə xəzinəsinə
ümumilikdə 1 milyard 60 milyon dollar gəlir gətirməsi
planlaşdırılır.
Hazırda Suriyaya 200 meqavat elektrik enerjisi ixrac olunur. Birecik-Hələb enerji xətti üzrə 500 meqavatlıq əlavə güc üçün texniki işlər başa çatmaq üzrədir. Yaxın aylarda ixrac gücü 700 meqavata çatacaq və bu da Suriyada təxminən 350 min ev təsərrüfatının elektrik tələbatını ödəyəcək.
Bununla yanaşı, Kilis-Hələb Təbii Qaz Xəttinin inşasının üç ay ərzində tamamlanacağı gözlənilir. Xətt vasitəsilə gündəlik 6 milyon kubmetr, illik isə 2 milyard kubmetr təbii qaz ixrac ediləcək. Hazırkı bazar qiymətləri ilə bu, 710 milyon dollarlıq qaz ixracı deməkdir.
Qeyd edək ki, Türkiyə Enerji və Təbii Sərvətlər naziri Alparslan Bayraktar, ixrac ediləcək qazın əsasən Hələb və Homsdakı elektrik stansiyalarında istifadə olunacağını bildirib. Nazir əlavə edib ki, enerji təminatı Suriyada həyatın normallaşması və Türkiyədəki suriyalıların könüllü geri dönüşü üçün vacib şərtlərdən biridir.
