BAKI, AzerVoice
Livanın tanınmış druz lideri və Proqressiv Sosialist Partiyasının sabiq sədri Valid Cunblat ölkəsindəki bütün silahlı qrupların, o cümlədən İranın dəstəklədiyi Hizbullahın da silahlarını Livan dövlətinə təhvil verməli olduğunu bildirib.
AzerVoice xəbər verir ki, o, bu çağırışı Beyrutda keçirdiyi mətbuat konfransında səsləndirib.
“Silah yalnız Livan dövlətinin əlində olmalıdır,” – deyə Cunblat çıxışında bəyan edib. O, partiyasına məxsus silahların artıq Livan ordusuna təhvil verildiyini açıqlayıb və Hizbullahdan da eyni məsuliyyəti nümayiş etdirməyi tələb edib.
Cunblatın bu çağırışı, Livan hökumətinin yalnız rəsmi silahlı qüvvələrin ölkədə fəaliyyət göstərməsi ilə bağlı verdiyi vədlərə və beynəlxalq ictimaiyyətin Hizbullahın silahsızlaşdırılması ilə bağlı artan təzyiqlərinə cavab olaraq səsləndirilib. Həmin vədlər Livan Nazirlər Kabinetinin fəaliyyət proqramında və Prezident Cozef Aunun andiçmə mərasimində də əks olunmuşdu.
Druz lideri eyni zamanda bildirib ki, ABŞ hazırda Suriya ilə sərhəd məsələləri də daxil olmaqla regionda yeni siyasi tənzimləmələr üzərində işləyir. “Yaxın Şərqdə yeni bir mərhələ başlayır,” – deyə Cunblat vurğulayıb. O əlavə edib: “Livanlı və ya qeyri-livanlı hər kəs silaha sahibdirsə, onu dövlətə təhvil verməlidir.”
Valid Cunblat çıxışı zamanı həmçinin İsrailin işğal etdiyi Şebaa Fermalarının Suriyaya məxsus olduğunu bildirib. Qeyd edək ki, bu ərazi Hermon (Şeyx) dağının qərb ətəklərində yerləşir və illərdir Livan, Suriya və İsrail arasında mübahisə predmeti olaraq qalır.
Hizbullah isə uzun illərdir öz silahlı fəaliyyətini məhz Şebaa Fermaları və Kfar Şuba təpələrinin “azad olunmamış” ərazi olduğunu əsas gətirərək davam etdirir. Son illərdə bu mübahisəyə İsrailin nəzarətində olan daha 13 sərhəd nöqtəsi və 2022-ci ildə ilhaq etdiyi Qacar kəndinin şimal hissəsi də əlavə edilib.
Cunblat çıxışının sonunda bildirib ki, gələcək nəsillər üçün ən güclü silah xalqın yaddaşıdır: “Livan xalqı öz müqavimət tarixçəsini, qürurunu və İsrailə qarşı mübarizənin hekayəsini yaşatmalıdır – ancaq silah anbarlarını deyil.”
