BAKI,AzerVoice, Fərid Mikayılov

Yuxu üçün tamamilə faydalı və ya zərərli hesab edilən qidalar mövcud deyil. Bu fikri britaniyalı dietoloq Elizabet Maxan bildirib. Onun sözlərinə görə, əsas məsələ düzgün qidalanma qaydalarına riayət etməkdir.

Maxan vurğulayıb ki, əksər dietoloqlar yuxudan əvvəl karbohidrat qəbulunu məsləhət görmür. Lakin bəzi araşdırmalar göstərir ki, karbohidratla zəngin axşam yeməkləri insanın daha tez yuxuya getməsinə kömək edə bilər. Yağlı qidalarla bağlı da ziddiyyətli nəticələr var: bir tərəfdən yağlı yemək daha doydurucu olduğu üçün sakit yuxunu dəstəkləyə bilər, digər tərəfdən isə yüksək yağlı pəhrizlər yuxunun müddətini azalda bilər.

Dietoloqun sözlərinə görə, axşam yeməklərində tərəvəzlər ən faydalı seçimdir. Onlar həzmi yavaşladır, faydalı maddələrin daha yaxşı mənimsənilməsinə kömək edir və gecəyarısı aclıq hissinin qarşısını alır.

Maxan əlavə edib ki, yumurta, tofun, qızılbalıq, süd, qoz-fındıq və toxumlar kimi məhsullar triptofanla zəngindir. Bu maddə yuxu hormonu melatoninin sintezində iştirak edir. Lakin dietoloq xəbərdarlıq edib ki, yalnız bu qidalara güvənmək düzgün deyil.

“Melatoninin tənzimlənməsi üçün işıq daha vacibdir. Əgər parlaq işıq altında oturursunuzsa, orqanizm melatonin ifraz etməyəcək”- deyə o bildirib.

Qeyd edək ki, bundan əvvəl qastroenteroloq Sergey Vyalyov yuxunu yaxşılaşdıran məhsulları sadalamışdı. Onun sözlərinə görə, bananlar əzələ gərginliyini azaldır, isti süd isə sinir sistemini sakitləşdirir.