BAKI, AzerVoice
Ağıllı telefona 13 yaşından əvvəl çıxış əldə edən uşaqlarda intihar düşüncələri, aşağı özünə dəyər hissi və reallıqdan uzaqlaşma hallarının daha çox müşahidə olunduğu ortaya çıxıb.
Tədqiqatda 18-24 yaş arası 100 min gəncin təqdim etdiyi məlumatlar əsasında 47 müxtəlif sosial, emosional və psixoloji funksiyalara əsaslanan “zehni sağlamlıq indeksi” hazırlanıb. Nəticələrə görə, uşağın ağıllı telefona çıxışı nə qədər erkən olarsa, zehni sağlamlığı bir o qədər zəif olur. M
Araşdırma göstərir ki, qız uşaqları bu təsirlərdən daha çox zərər görür. İştirakçılar arasında qadınların 9.5 faizi, kişilərin isə 7 faizi zehni sağlamlıqla bağlı çətinlik yaşadıqlarını etiraf edib.
Bundan əlavə, erkən yaşda telefon istifadə edən uşaqlarda yuxu pozuntuları və ailədaxili münasibətlərdə gərginlik ehtimalı daha yüksəkdir.
Tədqiqatın baş müəllifi, nevrobioloq Tara Tiaqaracan bildirib ki, ağıllı telefonların 13 yaşdan aşağı uşaqlar üçün qanunla tənzimlənməsi vacibdir.
Tiaqaracan həmçinin bu məhdudiyyətlərin sosial media platformalarında yaş yoxlamaları, rəqəmsal savadlılıq təhsili və texnologiya şirkətləri üçün daha ciddi hesabatlılıq mexanizmləri ilə müşayiət edilməsinin vacibliyini vurğulayıb.
Hazırda Fransa, İtaliya, Hollandiya, İspaniya və digər Avropa ölkələrində məktəblərdə ağıllı telefonlardan istifadəyə qismən və ya tam qadağalar tətbiq olunub. Fransa hökuməti isə 15 yaşdan aşağı şəxslərin sosial media platformalarına daxil olmasının qadağan edilməsini nəzərdə tutan qanun layihəsi üzərində işləyir.
