Bakı, AzerVoice

Elm adamları, şimal maqnit qütbünün indiki yerini müəyyən edən yeni model dərc edərək onun beş il əvvəlkindən daha da şərqə doğru, Sibirin yaxınlığına keçdiyini açıqlayıblar.

ABŞ və Böyük Britaniyadan olan tədqiqatçılar, maqnit sahəsinin dəyişməsinin həm təbiətə, həm də texnologiyaya təsirlərini vurğulayaraq, qütbün hərəkət sürətində dramatik dəyişikliklərin qeydə alındığını bildiriblər.

Britaniya Geoloji Xidmətindən doktor Con Kennedi və NOAA-nın baş tədqiqatçısı D. Arnaud Chulliat yeni yer dəyişməsini təsdiqləyən Dünya Maqnit Modelinin (WMM) yeniləndiyini açıqlayıblar. Bu model aviasiya, dənizçilik və NATO-nun müdafiə texnologiyalarında istifadə olunan naviqasiya sistemlərini yeniləmək üçün əsas rol oynayır.

Şimal maqnit qütbü ilk dəfə 1831-ci ildə Kanadanın şimalında, əsl Şimal Qütbündən 1610 kilometr cənubda İngilis kəşfiyyatçısı Ser Ceyms Klark Ross tərəfindən kəşf edilib. O vaxtdan etibarən qütb hər il şərqə doğru hərəkət edərək Sibirə yaxınlaşıb.

Alimlər qeyd edirlər ki, son 100 milyon il ərzində Yer kürəsi çoxsaylı maqnit qütb dəyişikliklərinə şahid olub. Bununla belə, müasir texnologiya dövründə belə dəyişikliklər hələ baş verməyib.

Tədqiqatçılar maqnit qütbünün hərəkətindəki dramatik dəyişikliklərin əsas səbəblərini hələ də dəqiqləşdirə bilməyiblər. Bununla belə, qütbün dəyişməsi ilə bağlı dəqiq proqnozlar üçün WMM sistemi yenilənərək gələcək illərdə dəqiq yerdəyişmələri izləməyə imkan verəcək.

Alimlər bu fenomenin təsirlərinin təkcə elmə deyil, həm də gündəlik həyatda naviqasiya texnologiyalarına təsir göstərə biləcəyini vurğulayırlar. Maqnit sahəsinin dəyişikliyi ilə bağlı araşdırmalar gələcəkdə daha çox suallara cavab tapmağı hədəfləyir.