BAKI, AzerVoice, Nailə Babazadə

İsrail ordusunun Suriyanın cənubunda yerləşən Kuneytra vilayətinin kənd ərazilərində müvəqqəti nəzarət məntəqəsi quraraq evlərə reydlər keçirdiyi bildirilir.

AzerVoice xəbər verir ki, Suriya dövlət televiziyası “Əl-İxbariyyə”nin məlumatına əsasən, İsrail hərbçiləri Kuneytra vilayətinin cənubunda yerləşən Ayn Zivan kəndinin girişində müvəqqəti nəzarət məntəqəsi yaradıblar. Məlumata görə, bölgədə reydlər keçirən hərbçilər yaşayış evlərində axtarış aparıb.

Bildirilir ki, baş verən hadisələr səbəbindən bəzi şagirdlər təhsil müəssisələrinə gedə bilməyib.

Dəməşq rəhbərliyi isə İsrailin Kuneytra və Dəraa vilayətlərinin kənd ərazilərində həyata keçirdiyi əməliyyatları və mülki şəxslərə qarşı hərəkətlərini 1974-cü ildə imzalanmış “Qüvvələrin Ayrılması haqqında Saziş”in açıq şəkildə pozulması kimi qiymətləndirir.

Suriya Prezidenti Əhməd Şaranın daha əvvəl verdiyi açıqlamaya görə, İsrail ordusu 8 dekabr 2024-cü il ilə 18 iyul 2025-ci il tarixləri arasında Suriyanın müxtəlif bölgələrinə 1000-dən çox hava zərbəsi və təxminən 400 quru əməliyyatı həyata keçirib.