İkinci Dünya Müharibəsindən sonra BMT Baş Assambleyası müharibədən dağılan ölkələrdə yaşayan uşaqlara yardım və dəstək göstərmək məqsədi ilə Birləşmiş Millətlər Uşaq Fondunun (UNICEF) yaradılması barədə səsvermə keçirdi və təşkilatın təsis edilməsinə qərar verdi.
1940-cı illərin sonlarında ərzaq və tibbi böhran aradan qalxdıqdan sonra da UNICEF fəaliyyətini davam etdirərək müxtəlif bölgələrdə çətin vəziyyətdə yaşayan uşaqlara yardım edən beynəlxalq yardım təşkilatına çevrildi. 1970-ci illərdə isə UNICEF uşaqların hüquqlarını müdafiə edən qlobal səviyyəli bir səs olaraq yüksəldi.
1980-ci illərdə UNICEF BMT-nin İnsan Haqları Komissiyasına Uşaq Hüquqları Konvensiyasının hazırlanmasında fəal dəstək göstərdi. 1989-cu ildə sənəd BMT Baş Assambleyasına təqdim ediləndən sonra “Uşaq Hüquqları Konvensiyası” tarixdə ən çox ratifikasiya olunan beynəlxalq insan hüquqları müqaviləsinə çevrildi. Onun tətbiqində və beynəlxalq səviyyədə tanıdılmasında UNICEF mühüm rol oynadı.
Hazırda Birləşmiş Ştatlar BMT-yə üzv olan ölkələr içində Konvensiyanı ratifikasiya etməyən yeganə dövlətdir. ABŞ sənədi ilkin olaraq imzalamış olsa da, ratifikasiya prosesi uzun illərdir baş tutmur. Rəsmi Vaşinqtonun əsas narahatlıqları Konvensiyanın milli suverenliyə və valideyn–uşaq münasibətlərinə mümkün təsirləri ilə bağlıdır.