BAKI,AzerVoice

ABŞ prezidenti Donald Tramp bu gün verdiyi açıqlamada, Fələstin HƏMAS hərəkatının ABŞ vasitəçiliyi ilə təqdim olunan atəşkəs təklifinə “müsbət ruhda” cavab verməsini “yaxşı xəbər” kimi qiymətləndirib. AzerVocie xəbər verir ki, Tramp prezident təyyarəsində jurnalistlərə açıqlamasında bildirib ki, bu həftə ərzində Qəzza zolağında atəşkəs razılaşması əldə oluna bilər, lakin o, hazırda danışıqların hansı mərhələdə olduğu barədə konkret məlumata malik olmadığını vurğulayıb.

Xatırladaq ki, HƏMAS hərəkatı ötən cümə günü vasitəçilər tərəfindən təqdim olunan son atəşkəs təklifi ilə bağlı daxili məsləhətləşmələri və digər fələstinli qruplarla müzakirələri tamamladığını açıqlayıb. Hərəkatın yaydığı bəyanatda, təklifə müsbət və konstruktiv ruhda cavab verildiyi və bu çərçivənin icrası ilə bağlı ciddi və dərhal başlaya biləcək danışıqlara hazır olduqları bildirilib.

Reuters agentliyinə danışan bir fələstinli rəsmi isə HƏMAS-ın təqdim etdiyi cavabın atəşkəs razılaşmasının əldə olunmasını asanlaşdıracaq dərəcədə müsbət xarakter daşıdığını bildirib.

Hazırda gözlər ABŞ vasitəçiliyi ilə davam edən danışıqların nəticəsindədir.