BAKI, AzerVoice

Neft İxrac Edən Ölkələr Təşkilatı (OPEC) yeni üzvlərin qoşulmasına həmişə açıqdır.

AzerVoice xəbər verir ki, bu barədə OPEC-in baş katibi Heysəm əl-Qays Vyanada keçirilən 9-cu Beynəlxalq OPEC Seminarında jurnalistlərə açıqlamasında bildirib.

“Əgər ölkələr OPEC-in meyarlarına cavab verirlərsə, biz onların təşkilata qoşulmasına açığıq. Aydındır ki, bu ölkələrin OPEC üzvləri ilə oxşar məqsədləri olmalı və onlar əhəmiyyətli neft ixracatçıları sayılmalıdırlar” – deyə, əl-Qays qeyd edib.

Baş katib vurğulayıb ki, təşkilat bir çox ölkələrlə danışıqlar aparır:

“Mən bir sıra Afrika ölkələri, o cümlədən Seneqal ilə görüşlər keçirmişəm. Namibiya gələcəkdə potensiala malikdir. Amma yeni üzvlərin OPEC-ə rəsmi qoşulmasından danışa bilmərəm”.

Əl-Qeys həmçinin xatırladıb ki, son vaxtlar Braziliya OPEC+ əməkdaşlıq Xartiyasına qoşulub.

“Fikrimcə, Braziliyadan soruşmaq lazımdır ki, onlar növbəti mərhələyə keçmək istəyirlərmi. Biz onları tərəfdaş kimi müsbət qarşılayırıq, amma onların bu öhdəlikləri götürməyə hazır olub-olmadığını bilmirəm” - deyə, Baş katib vurğulayıb.

Qeyd edək ki, hazırda OPEC-ə 12 neft ixrac edən ölkə daxildir. Təşkilatın tərkibində son dəyişiklik 2023-cü ilin dekabrında baş verib. Həmin vaxt Anqola OPEC-dən çıxmaq qərarı verib.

Həmçinin qeyd edək ki, 9-cu Beynəlxalq OPEC Seminarı 9–10 iyul tarixlərində Vyanada keçirilib.