BAKI, AzerVoice
12 may 2025-ci il tarixində Qırğızıstanın Çüy vilayətinin İssık-Ata rayonunun Krasnaya Reçka kəndində Türk Mədəniyyəti və İrsi Fondunun prezidenti Aktotı Raimkulova, Qırğız Respublikasının Mədəniyyət, İnformasiya və Gənclər Siyasəti nazirinin müavini Gülbara Abdıkalıqovaya rəsmi sertifikat təqdim edib.
AzerVoice xəbər verir ki, sertifikat, Ümumdünya İrs siyahısına daxil olan kənd ərazisindəki yaşayış yerinin muzey zonasında aparılacaq genişləndirmə işlərinin birinci mərhələsinə start verilməsi ilə bağlı təqdim olunub.
Sertifikatın təqdim edilməsi, mədəni irsin qorunmasına yönəlmiş səylərin əhəmiyyətini və bu sahədə beynəlxalq əməkdaşlığın vacibliyini bir daha önə çıxarıb.
Tədbir zamanı çıxış edənlər UNESCO-nun “İpək Yolu: Çanqan-Tyanşan Dəhlizinin Marşrutlar Şəbəkəsi” adlı transmilli seriyalı nominasiyasına daxil olan arxeoloji abidələrin qorunması üçün birgə fəaliyyətin zəruriliyini vurğulayıblar.
X–XII əsrlərə aid Qaraxanlı dövrünə məxsus yaşayış kompleksi, Mərkəzi Asiya orta əsr memarlığının nadir nümunələrindən biri olmaqla yanaşı, Krasnaya Reçka kəndinin tarixi-mədəni mənzərəsinin ayrılmaz hissəsini təşkil edir. Yeni inşa olunacaq qoruyucu örtük bu nadir abidəni təbii təsirlərdən mühafizə etməyə, həmçinin elmi araşdırmaların və turist ziyarətlərinin daha əlverişli şəraitdə aparılmasına imkan yaradacaq.
