BAKI, AzerVoice
Avropa ölkələrində rekord istilər qeydə alınıb.
AzerVoice-un məlumatına görə, İspaniya, Portuqaliya, İtaliya və Fransada temperatur rekord həddə çatıb. Belçika və Hollandiyada isə sabah və çərşənbə günü havanın 38 dərəcəyə yüksələcəyi barədə xəbərdarlıq edilib.
Xüsusilə İspaniya, Portuqaliya və Fransada dünəndən istilər pik həddə çatıb. İspaniyanın Huelva şəhərində temperatur 46 dərəcəyə yüksəlib. Portuqaliyada isə 1950-ci illərdən bu yana ən yüksək temperatur müşahidə olunub. Paytaxt Lissabon yaxınlığındakı Mora bölgəsində istilik 46,6 dərəcəyə çatıb.
İtaliyada müşahidə olunan yüksək istilər meşə yanğınlarının artmasına səbəb olub. Roma, Milan, Florensiya və Verona daxil olmaqla 17 bölgədə meşə yanğınları və yüksək temperatur səbəbilə qırmızı xəbərdarlıq elan edilib.
Fransada isə 95 vilayətdən 84-də hava istiliyi 40 dərəcəni keçdiyi üçün narıncı xəbərdarlıq səviyyəsinə keçilib. Gözlənilir ki, yüksək temperatur həftənin ortasına qədər davam edəcək. Bu səbəblə bəzi bölgələrdə məktəblər bazar ertəsi, çərşənbə axşamı və çərşənbə günləri bağlanıb.
Cənubi Avropa ölkələrini bürüyən istilərin bu gündən etibarən şimala doğru irəliləyərək Belçika və Hollandiyada da təsirini göstərəcəyi proqnozlaşdırılır. Sakinlərə zəruri olmadıqca çölə çıxmamaq, bol maye qəbul etmək və xüsusilə körpələr və yaşlılara qarşı ehtiyatlı olmaq tövsiyə olunub.
Belçika Kraliyət Meteorologiya İnstitutunun (IRM) xəbərdarlığına əsasən, Belçikada çərşənbə axşamı havanın 36–37 dərəcə, çərşənbə günü isə 37–38 dərəcə olacağı gözlənilir. Açıqlamada yüksək rütubətlə birləşəcək bu temperaturun tənəffüs və ürək xəstələri üçün ciddi təhlükə yaratdığı vurğulanıb və ölkədə narıncı xəbərdarlıq səviyyəsinə keçiləcəyi bildirilib.
