BAKI, AzerVoice
ABŞ Yəməndəki "Ənsar Allah" (husilər) hərəkatına qarşı hava zərbələrini dayandırır.
AzerVoice xəbər verir ki, bu barədə ABŞ prezidenti Donald tramp bildirib.
"Onlar (husilər) bizə dedilər ki, daha döyüşmək istəmirlər. Və biz buna hörmətlə yanaşırıq. Biz hava zərbələrini dayandıracağıq. Onlar təslim oldular" – deyə, Tramp bildirib.
Tramp əlavə edib ki, husilər qarşılığında Qırmızı dənizdə və Bəb əl-Məndəb boğazında gəmilərə hücum etməyəcəklərinə söz veriblər.
Jurnalistlərin ABŞ rəhbərliyinin husilərin gəmilərə hücum etməyəcəyinə dair vədə əsaslanıb bombardımanı dayandırmasının nə dərəcədə etibarlı olduğu ilə bağlı Trampa sual veriblər. Tramp isə bu sualı belə cavablandırıb: "Bu, əhəmiyyətli deyil. Onlar artıq istəmirlər ki, biz onlara zərbələr endirək. Əslində, mən bunun belə olacağını gözləyirdim."
Qeyd edək ki, martın 15-də Trampın əmri ilə ABŞ ordusu Yəmənin təxminən üçdə birinə nəzarət edən husilərin mövqelərinə genişmiqyaslı hava zərbələri endirmişdi. ABŞ Mərkəzi Komandanlığı (CENTCOM) əməliyyatın məqsədinin ABŞ maraqlarını qorumaq və təhlükəsiz gəmiçiliyi təmin etmək olduğunu bildirmişdi. Cavab olaraq, "Ənsar Allah" hərəkatı Qırmızı dənizin şimalında yerləşən "Harry Truman" təyyarədaşıyan gəmisinə bir sıra hava hücumları etmişdi.
