Bakı, AzerVoice Analitik Təhlil Mərkəzi

İranın ali rəhbərinin siyasi müşaviri Əli Şəmxani, qızının toy mərasimindən sızdırılan videoya görə İsraili dolayı yolla ittiham edib. Siyasi qalmaqaldan sonra ilk dəfə ictimaiyyət qarşısına çıxan Şəmxani “X” platformasında ivrit dilində “Hələ sağam, ey alçaqlar” sözlərini yazıb.

Video, Tehrandakı lüks oteldə keçirilən toy mərasimində hicab qaydalarına riayət olunmayan görüntülərlə müşayiət olunub və İran cəmiyyətində geniş rezonans doğurub. İctimaiyyət rəsmiləri “lüks həyat” tərzində ittiham edərkən, “Təsnim” agentliyi videonun yayımlanmasını “qeyri-əxlaqi və qanunsuz” adlandırıb.

Agentlik, videonun yayımlanmasının məqsədini sual altına alaraq qeyd edib: “Nə üçün hər dəfə Şəmxani nüvə danışıqları və ya hökumətlə bağlı açıqlama verdikdən sonra şəxsi həyatı ilə bağlı məsələlər ortaya çıxır?”

Siyasi və təhlükəsizlik ziddiyyətləri

Şəmxani daha əvvəl İsrailin hücumlarında hədəf alınmışdı. O, evinə endirilən zərbədən sonra “möcüzəvi şəkildə xilas olduğu” bildirilmişdi. Son müsahibəsində isə 2020-ci ildə Ukrayna sərnişin təyyarəsinin vurulması ilə bağlı keçmiş prezident Həsən Ruhaniyə “İslam İnqilabı Keşikçiləri Korpusu”nun məsuliyyətini dərhal çatdırdığını deyərək, Ruhani və Cavad Zərifin bəyanatlarını təkzib etmişdi. Buna cavab olaraq Ruhaniyə yaxın şəxslər Şəmxanini “daxili qarşıdurmanı dərinləşdirməkdə” günahlandırıblar. Ruhaniyə yaxın “Xəbər Online” mənbəsi videonun sızdırılmasında Ruhani komandasının iştirakını təkzib edib və “bu kampaniyalar milli birliyə qarşı yönəlib” deyib.

İran mediasında qarşıdurma

Ali Rəhbər ofisinə yaxın “Keyhan” qəzeti, videonun yayılmasını “psixoloji müharibə”nin tərkib hissəsi adlandırıb və “daxili parçalanma yaratmaq məqsədilə xaricdən yönləndirilən informasiya əməliyyatı” kimi dəyərləndirib. Qəzet yazır ki, Şəmxani “İranın müdafiə qabiliyyətinin əsas memarlarından biri” kimi Qərb və İsrail üçün hədəfdir.
Bununla yanaşı, “Etemad” qəzeti isə məsələyə fərqli yanaşaraq yazıb: “İsrailin fiziki hücumundan sonra indi Şəmxaniyə qarşı mənəvi sui-qəsd həyata keçirilir.”

İranda siyasi parçalanmanın əlamətləri

Hadisə, İran daxilində reformist və mühafizəkar düşərgələr arasındakı gərginliyin dərinləşdiyini göstərir. Analitiklərə görə, Şəmxaniyə qarşı kampaniya həm xarici təxribat, həm də daxili güc balansının dəyişməsi ilə əlaqədardır.