BAKI,AzerVoice Analitik Təhlil Mərkəzi
Qəzzada İsrailin “mustaribun” adlanan xüsusi qüvvələrinin fəaliyyəti artmaqdadır. Bu qüvvələr yaşayış məhəllələrinin dərinliklərinə daxil olaraq fələstinliləri oğurlayır. Oğurlananlar arasında HƏMAS və digər qruplaşmalara mənsub şəxslər, həm də mülki şəxslər var.
Ən son hadisə mərhum doktor Mərvan əl-Həmsin ailəsi ilə bağlı olub. Onun qızı, tibb bacısı Təsnim əl-Həmsin, Xan Yunusun Muvassi bölgəsində sahə xəstəxanası yaxınlığından İsrail xüsusi qüvvələri tərəfindən aparıldığı bildirilib.
Bu, iyulun 21-də atasının eyni tip əməliyyatla oğurlanmasından sonra ailənin ikinci faciəsi kimi qiymətləndirilir. Ailə yeni oğurlamanı qınayaraq əməliyyatda Yasir Abu Şəbab adlı şəxsin rəhbərlik etdiyi və özünü “Xalq Qüvvələri” adlandıran silahlı dəstənin də iştirak etdiyini bəyan edib.
Atasının oğurlanmasının səbəbləri açıqlanmadığı kimi, qızının aparılmasının da motivi bilinmir. Lakin müşahidəçilər son həftələrdə artan oxşar əməliyyatları nəzərə alaraq bildirirlər ki, bu oğurlamaların çoxu israilli girovların taleyi ilə bağlı məlumat əldə etməyə yönəlib.
Mənbələrin sözlərinə görə, bəziləri güman edir ki, Mərvan əl-Həms və qızı israilli girovlara tibbi yardım göstərib və İsrail onların bu barədə bilgilərini öyrənmək istəyir. Qeyd olunur ki, 7 oktyabr 2023 hadisələrindən sonra bəzi israilli girovlar Qəzzadakı ümumi xəstəxanalara gətirilmişdi.
Mənbələr Təsnim əl-Həmsin oğurlanmasını atasına edilən sorğularla əlaqələndirir. HƏMAS mənbələri də ailənin oğurlama səbəbləri barədə heç bir məlumat almadığını təsdiqləyir. Mərvan əl-Həms Qəzzadakı HƏMAS hökumətinin Səhiyyə Nazirliyində sahə xəstəxanalarına cavabdeh və sözçü vəzifəsində idi. O, əvvəllər Əbu Yusif ən-Nəccar xəstəxanasına rəhbərlik edib, evi isə müharibə zamanı bombalanıb.
Mənbələr bildirir ki, İsrail xüsusi qüvvələri müxtəlif qruplaşmaların üzvlərini, bəzən də xəstəxanaların içərisindən oğurlayıb. Təxminən 45 gün əvvəl Deyr əl-Bəlah şəhərində “İslam Cihadı”nın yüksək səviyyəli rəhbərlərindən birinin kürəkəni aparılıb. Eyni əməliyyatda pilotsuz təyyarə onun oğlunu öldürüb. İsrail xüsusi qüvvələri həmin şəxsə aid şəxsiyyət vəsiqəsini və əşyalarını mülki şəxslərin olduğu zərbənin yerinə atıb. Mənbələr bildirir ki, həmin kürəkən israilli bir girovla təmasda olub və əməliyyat həm də hərəkat rəhbərini gizləndiyi yerdən çıxarmağa hesablanmışdı, lakin uğursuz olub. Həmin hadisədən sonra girov başqa yerə köçürülüb.
20 gün ərzində isə Şati düşərgəsi və Nəsr məhəlləsində üç Qəzzalı fəal oğurlanıb. Onlardan ikisi israilli girovları qoruyan, digəri isə “Qəzzam Kəşfiyyatı”nın rabitə əlaqələrində çalışan şəxs olub.
Məlumatların əldə edilməsi və hərbi əməliyyatlar
İsrail oğurlananlardan bəzilərindən mühüm məlumatlar əldə edib. Məsələn, “Şati briqadası”nın düşərgəyə hücuma qarşı hazırladığı plan ələ keçirilib. Bu, İsrail ordusunun bəzi pusqu və minalı yolları kənara qoyaraq başqa marşrut seçməsinə imkan yaradıb.
Daha sonra İsrail qırıcıları bir sıra evləri bombalayıb, həmin evlərin bəzilərində əvvəllər israilli girovların saxlanıldığı bildirilib.
Son aylar İsrail ordusu həmçinin bəzi hədəfli qətllər həyata keçirib. İsrail “Bureyc briqadası”nın komandiri Həsən Hüseynin, “Zeytun briqadası”nın müavini Musa Şəldanın və “Şati briqadası”nın liderlərindən Vail Mətriyənin öldürüldüyünü açıqlayıb. Ordunun iddiasına görə, bu şəxslər girovların saxlanılması və daşınmasında, habelə ötən yanvar ayında başlamış son atəşkəs zamanı onların təhvil verilməsində iştirak ediblər.
İsrail xüsusi qüvvələri Qəzza daxilində kəşfiyyat fəaliyyətini də gücləndirib. Onlar casuslardan istifadə edərək bəzi evlərə və xəstəxanalara nəzarət aparır, gizli kameralar və dinləmə cihazları quraşdırır. Bir sıra belə cihazların son həftələrdə aşkarlanaraq zərərsizləşdirildiyi bildirilir.
Qəzzadakı HƏMAS qüvvələrinin təhlükəsizlik orqanları bu cür fəaliyyətlərin qarşısını almaq üçün tədbirlər görüb. Qassam briqadalarının üzvlərinə silah və qumbara daşımaq, daim ayıq-sayıq olmaq barədə göstərişlər verilib.