BAKI, AzerVoice, Analitik təhlil Mərkəzi

Çin Xalq Azadlıq Ordusu illərdir quru qoşunlarının əsas dayağı olan ağır tank filolarından tədricən uzaqlaşaraq, müasir döyüş meydanlarının tələblərinə uyğun yüngül, çevik və yüksək sürətli əməliyyatlarına uyğun zirehli vasitələrə yönəlməyə başlayıb.

3 sentyabrda keçirilən hərbi parad bu dəyişimin ən aydın göstəricisi oldu. Ənənəvi ağır zirehli bölmələrin yerini orta çəkili tanklar və eyni platforma üzərində qurulmuş çoxməqsədli zirehli texnikalar aldı.

Type 100 və ZTZ-201 diqqət mərkəzində

Paradda ən çox maraq doğuran nümunələrdən biri yeni nəsil Type 100 orta tankı və onunla birlikdə təqdim olunan zirehli vasitələr ailəsi oldu. Bu platformalar ağır tanklara nisbətən daha yüngül, sürətli və yüksək manevr qabiliyyətli alternativ kimi qiymətləndirilir.

Həmçinin ilk dəfə təqdim edilən ZTZ-201 orta tankı təxminən 35–40 ton ağırlığa malikdir. Tank sadalanan innovativ texnologiyalarla təchiz olunub: hibrit hərəkət sistemi,uzaqdan idarə olunan qüllə,aktiv müdafiə sistemləri, dron əleyhinə müdafiə inteqrasiyası.

Hərbi ekspertlərə görə, Çin bu dəyişikliklə həm Asiyanın dağlıq bölgələrində, həm də yüksək irtifa ərazilərdə əməliyyat imkanlarını artırmağı hədəfləyir. Bundan başqa, daha yüngül və çevik texnikalar Pekinə həm logistik üstünlük, həm də sürətli yerləşdirmə imkanları qazandıracaq.