BAKI, AzerVoice, Nailə Babazadə

Çinin Honq Konq Xüsusi İnzibati Regionunun Tai Po bölgəsində 8 binadan ibarət yaşayış kompleksində baş verən yanğında həlak olanların sayının 94-ə yüksəldiyi bildirilib.

AzerVoice xəbər verir ki, Honq Konq Yanğınsöndürmə Xidmətinin məlumatına görə, yanğında indiyədək biri yanğınsöndürən olmaqla 94 nəfər həyatını itirib, 11-i yanğınsöndürən olmaqla 76 nəfər yaralanıb.

Təxminən 4 min nəfərin yaşadığı bildirilən komplekdə yanğının söndürülməsi üzrə işlərin 40 saatdan artıqdır davam etdiyi qeyd olunub.

Axtarış-xilasetmə işlərini davam etdirən yanğınsöndürənlərin, komplekdən gələn 25 yardım çağırışına hələ də çata bilmədikləri açıqlanıb.

Tai Po rayonunda 1900-dən çox mənzilin olduğu Vanq Fuk Sitesində 26 noyabrda günorta saatlarında başlayan yanğın, binaların təmiri üçün xarici fasadlara quraşdırılmış bambuk iskələlərin və yanıcı izolyasiya materiallarının alışması nəticəsində sürətlə yayılmışdı.

Polis rəsmiləri yanğınla bağlı təmir işlərini aparan tikinti şirkətinin iki meneceri və bir məsləhətçi mühəndis olmaqla 3 nəfərin “ehtiyatsızlıqdan ölümlə nəticələnən vəziyyətə səbəb olmaq” ittihamı ilə saxlanıldığını bildirib.

Honq Konqda yanğınların şiddətinə görə tətbiq edilən 5 pilləli dərəcələndirmə sistemində, 17 ildən sonra ilk dəfə 5-ci səviyyə siqnalı verilib.

Hadisə, Honq Konqda son 70 ildə ən çox can itkisinə səbəb olan yanğın kimi qeydə alınıb.