BAKI,AzerVoice, Nailə Babazadə

ASELSAN, suya yaxın uçan raketlərə qarşı hazırlanmış GÖKSUR yaxın hava müdafiə sisteminin dikey atış versiyasının sınaqlarının uğurla tamamlandığını açıqlayıb.

AzerVoice xəbər verir ki, şirkətdən verilən məlumata görə, GÖKSUR sistemi Türkiyə hərbi gəmilərinin “polad qalxanı” kimi qiymətləndirilir və xüsusilə səthə yaxın uçan gəmiəleyhinə və qanadlı raketlərə qarşı yüksək effektivlik nümayiş etdirir.

Sistem süni intellektlə təkmilləşdirilmiş inkişaf etmiş atəş idarəetmə mexanizminə sahibdir və bu xüsusiyyət dəniz platformalarının müdafiə qabiliyyətini xeyli artırır. GÖKSUR-un 360 dərəcə hədəfi məhv etmə imkanı, yeni nəsil infraqırmızı axtarıcı başlıqlı idarəolunan raketləri, çoxsaylı hədəflərə qarşı eyni anda angajman qabiliyyəti və modulyar quruluşu onun müxtəlif ölçülü dəniz platformalarına asanlıqla inteqrasiya edilməsinə şərait yaradır.

ASELSAN bildirib ki, sistemin döyüş idarəetmə sisteminə inteqrasiya və ya müstəqil şəkildə işləyə bilməsi, uplink/downlink məlumat ötürücülü ara mərhələ idarəetməsi kimi xüsusiyyətlər GÖKSUR-u Türkiyənin “Mavi Vatan” müdafiə konsepsiyası üçün strateji əhəmiyyətli edir. Şirkət həmçinin bu sistemin modulyar quruluşu sayəsində fırkateyn və korvetlər də daxil olmaqla müxtəlif platformalara uyğunlaşdırılmasının yüksək ixrac potensialı yaratdığını vurğulayıb.