BAKI, AzerVoice Analitik Təhlil Mərkəzi
Qəzza zolağında vəziyyətin gərginləşməsindən bəri Misir zaman-zaman müxtəlif hərbi siqnallar göndərir. Bu addımlarla ölkə öz milli təhlükəsizliyinə qarşı istənilən təcavüzü dəf etməyə qadir olduğunu nümayiş etdirir. Misirli hərbi rəsmilər İsrailin adını açıq çəkməsələr də, bu mesajların hamısı dolayı yolla İsrailə ünvanlandığı kimi şərh edilir. Ən diqqətçəkən addımlar arasında Şimali Sinay bölgəsinə ağır texnikanın gətirilməsi və Rafah sərhəd-keçid məntəqəsi yaxınlığında əsgərlərin sayının artırılması var.
İordaniya hərbi nümayəndə heyətinin Qahirəyə səfəri də regional təhdidlərin böyüklüyünə işarə kimi qiymətləndirildi. Qahirə və Əmman Qəzzadakı hadisələrin hər iki ölkənin təhlükəsizliyinə təsirindən ehtiyat edir. Çünki İsrailin fələstinliləri məcburi köçkün vəziyyətinə salmaq və onların məsələsini ləğv etmək planı həm Misiri, həm də İordaniyanı hədəfə alır.
Bazar günü Misirin müdafiə naziri general-polkovnik Əbdülməcid Səqr İordaniya Silahlı Qüvvələrinin Baş Qərargah rəisi general Yusif Əhməd Həniti ilə görüşdü. Görüşdə iki ölkənin orduları arasında əməkdaşlığın gücləndirilməsi, regional və beynəlxalq proseslərin Yaxın Şərqdə təhlükəsizlik və sabitliyə təsiri müzakirə edildi.
Təhlükə hissi və yüksək səfərbərlik ehtiyacı
Bu cür hərbi tədbirlər yaxın və qəfil təhlükə hissindən xəbər verir və yüksək səfərbərlik zərurətini ortaya qoyur. Görüşün vaxtı da ciddi narahatlıqlara işarədir və təhlükəsizlik boşluqlarının qarşısını almaq üçün koordinasiyanın vacibliyini göstərir. Misir və İordaniya isə hazırda İsrailə qarşı birbaşa hərbi toqquşmaya girmək fikrində deyil.
Ali hərbi rəhbərlikdən gələn müxtəlif siqnallar da göstərir ki, hazırlıq təkcə Qəzza ilə bağlı deyil. Çünki Qərbdən – Liviyadan fəaliyyət göstərən radikal qruplar, yaxud Cənubdan – Sudandakı vətəndaş müharibəsi və onun yaratdığı sərhəd boşluqları da Misir üçün təhdidlərdir. Bundan əlavə, Qırmızı dənizin cənubunda baş verən hərbi əməliyyatlar Süveyş kanalında gəmilərin hərəkətinə mane olur və gəlirlərə mənfi təsir göstərir.
Ordunun mesajı: Təhlükəsizlik boşluğu buraxılmayacaq
Müdafiə nazirinin Qərb bölgəsindəki komandanlarla görüşü həm də “ordunun diqqəti yalnız Sinaya yönəlib” tipli şayiələri rədd etmək məqsədi daşıyırdı. Misir ordusu hesab edir ki, bütün təhdidlərə cavab vermək gücündədir, amma xalqın dəstəyi vacibdir.
Nazirin bəyanatında ordunun “həyati məsələləri taleyin ümidinə buraxmadığı” mesajı da vardı. Yəni kiçik təhlükə belə böyüyə çevrilə bilər, buna görə də çoxşaxəli hazırlıq potensial rəqiblər üçün əsas çəkindirmə vasitəsidir.
Rəsmi açıqlamada bildirildi ki, görüş Baş Qərargah rəisi Əhməd Xəlifə, əsas qoşun növlərinin komandanları və digər yüksək rütbəli zabitlərin iştirakı ilə keçirilib. Bu, hər an baş verə biləcək təhlükəyə qarşı yüksək döyüş hazırlığı siqnalı sayılır.
İsrailin planları və Misirin narahatlığı
Müşahidəçilər qeyd edir ki, İsrail ordusunun Qəzza şəhərini tam ələ keçirmək və əhalini cənuba – Misir sərhədinə doğru sıxışdırmaq planı çox təhlükəlidir. Çünki bu halda fələstinlilər Misir torpaqlarına keçməyə məcbur ola bilər və artıq geri qaytarılmayacaqlar.
Bunun fonunda İsrail baş naziri Benyamin Netanyahunun televiziya çıxışında dilə gətirdiyi “Böyük İsrail” anlayışı təsadüfi sayıla bilməz. Bu, Qəzza müharibəsinin bölgədə yeni müharibələrə giriş ola biləcəyini göstərir. Bu da Misir hərbi doktrinasında İsraillə sülhə güvənməklə kifayətlənməmək, daima hazır olmaq prinsipini daha da gücləndirir.
Misirin narahatlığını artıran digər məqam da İsrail hökumətinin HƏMASla danışıqları pozmasıdər. Bu səbəbdən Qahirə dəfələrlə İsrailin hərbi əməliyyatlarını qınayıb və beynəlxalq ictimaiyyəti daha böyük partlayış baş vermədən hərəkətə keçməyə çağırıb.