BAKI, AzerVoice, Nailə Babazadə

Türkiyə Xarici İşlər Naziri Hakan Fidan İordaniya Xarici İşlər Naziri Eymen əs-Safedi və Səudiyyə Ərəbistanı Xarici İşlər Naziri Feysəl bin Fərhan ilə telefon danışığı həyata keçirib.

AzerVoice xəbər verir ki, Türkiyə Xarici İşlər Nazirliyindən əldə olunan məlumata görə, görüş zamanı Qəzza Sülh Planının icrası ilə bağlı bir sıra məsələlər ətraflı şəkildə müzakirə olunub. Fidan görüşdə bölgədə sülh və sabitliyin təmin edilməsinin vacibliyini vurğulayıb, tərəflərin koordinasiyalı fəaliyyət göstərməsinin əhəmiyyətini qeyd edib.

Görüşdə həmçinin humanitar yardımın təşkili, tərəflər arasında dialoqun gücləndirilməsi və planın mərhələli olaraq həyata keçirilməsi məsələləri də gündəmə gətirilib. Nazir Fidan, Türkiyənin bölgədə sülhün bərqərar olması üçün diplomatik səylərini davam etdirəcəyini bildirərək, həmkarları ilə əməkdaşlığın gücləndirilməsinə hazır olduğunu vurğulayıb.

Tərəflər telefon danışığını səmimi və konstruktiv bir atmosferdə keçirdiklərini qeyd edərək, gələcəkdə birgə addımların atılması mövzusunda razılığa gəliblər.