BAKI, AzerVoice, Nailə Babazadə

Baykar və ASELSAN tərəfindən milli imkanlarla inkişaf etdirilən qabaqcıl müdafiə texnologiyaları Aralıq dənizində həyata keçirilən kritik bir sınaqda bir daha özünü təsdiqlədi. “Mavi Vətən” konsepsiyası çərçivəsində Türkiyənin dənizdə birgə əməliyyat qabiliyyətini nümayiş etdirən test zamanı yüksək koordinasiya və dəqiqliklə icra edilmiş əməliyyat uğurla başa çatıb.

AzerVoice xəbər verir ki, sınaq çərçivəsində TCG Anadolu gəmisinin göyərtəsindən havaya qalxan Bayraktar TB3 SİHA, geniş rabitə imkanlarına malik məlumat bağlantısı vasitəsilə ASELSAN tərəfindən hazırlanan Albatros-S KİDA-nı idarə etdi. TB3-ün yönləndirməsi altında hərəkət edən Albatros-S, dəniz üzərində yerləşən hədəfi yüksək dəqiqliklə aşkar edərək zərərsizləşdirdi. Bu, dənizdə pilotsuz hava və dəniz vasitələrinin sinxron fəaliyyət göstərə bilməsi baxımından mühüm mərhələ kimi qiymətləndirilib.

Test, həm Bayraktar TB3-ün dəniz əməliyyatlarında artan rolunu, həm də Albatros-S kimi insansız dəniz platformalarının TCG Anadolu kimi çoxməqsədli hərbi gəmilərlə inteqrasiyasını nümayiş etdirdi. Eyni zamanda sınaq, Türkiyənin gələcəkdə dənizdə tam inteqrasiya olunmuş pilotsuz əməliyyat şəbəkəsi qurma hədəfinə doğru mühüm addım hesab olunur.

Bu sınaqla Türkiyə, insansız hava və dəniz sistemlərini eyni əməliyyat sahəsində koordinə etmə qabiliyyətini real şəraitdə göstərərək müdafiə texnologiyaları sahəsində əldə etdiyi üstünlüyü bir daha təsdiqləyib.