BAKI,AzerVoice, Orxan Qədirzadə

Türkiyə prezidenti Rəcəb Tayyib Ərdoğanın sədrliyi ilə Nazirlər Kabinetinin iclası bu gün Ankara Beştepedə keçirilib. AzerVoice xəbər verir ki, toplantının əsas gündəmində Gürcüstan–Azərbaycan sərhədində baş verən hərbi təyyarə qəzası, “Terrorsuz Türkiyə” strategiyası, iqtisadi proseslər və regional gərginliklər yer alıb.

Gürcüstan–Azərbaycan sərhədində baş verən və 20 hərbçinin şəhid olması ilə nəticələnən təyyarə qəzasından sonra bölgəyə Türk Silahlı Qüvvələrinin xüsusi araşdırma qrupu göndərilmişdi. Milli Müdafiə Naziri Yaşar Gülərin həmin qrupun topladığı delillər və ilkin tapıntılarla bağlı kabinəyə geniş təqdimat verməsi gözlənilir.

PKK-nın silah buraxdığını və Türkiyə ərazisindən tam çəkildiyini elan etməsindən sonra hökumət, terrorla mübarizədə yeni mərhələyə keçir. İclasda sərhəd bölgələrində təhlükəsizlik tədbirlərinin davamı, əməliyyat sonrası planlamalar və sahədəki son vəziyyət müzakirə olunub.

Hökumətin iqtisadi gündəliyi çərçivəsində inflyasiya ilə mübarizə, qiymət sabitliyi və iqtisadi sabitləşdirici tədbirlərin icrası da toplantının vacib hissəsi olub. İlin sonuna qədər tətbiq ediləcək yeni addımlar və iqtisadi islahatlar müzakirəyə çıxarılıb.

Regional təhlükəsizlik məsələləri çərçivəsində Qəzzədə atəşkəs sonrası humanitar böhran və Suriyadakı siyasi-hərbi vəziyyət də geniş təhlil edilib. Türkiyənin bölgəyə yardım səyləri və beynəlxalq diplomatik təşəbbüsləri dəyərləndirilib.