BAKI, AzerVoice, Nailə Babazadə
İtaliya Müdafiə Nazirliyinin yüksək səviyyəli nümayəndə heyəti Türkiyənin pilotsuz uçuş aparatları sahəsində dünya miqyasında tanınan şirkəti “Baykar”ın istehsalat və texnoloji mərkəzində olub. Heyət, şirkətin yeni nəsil müdafiə texnologiyaları və gələcək layihələri ilə yaxından tanış olub.
AzerVoice xəbər verir ki, İtaliyanın müdafiə nazirinin müavini Matteo Perego di Cremnago, Hərbi Hava Qüvvələri Komandanı Korgeneral Antonio Conserva, Quru Qoşunları Komandanı Korgeneral Carmine Masiello və Hərbi Dəniz Qüvvələri Komandanının müavini Koramiral Giuseppe Berutti Bergotto başda olmaqla geniş nümayəndə heyəti Baykar Texnologiyalarını ziyarət edib.
Səfər zamanı qonaqlara şirkətin “Bayraktar TB2”, “Akıncı” və “Kızılelma” kimi pilotsuz uçuş sistemləri barədə ətraflı məlumat verilib. Heyət həmçinin uçuş və atış sınaqlarını yerində izləyərək sistemlərin texniki imkanları barədə geniş təqdimat alıb.
Baykar rəhbərliyi İtaliya nümayəndələrinə şirkətin gələcək vizyonu, yeni nəsil müdafiə texnologiyalarının inkişafı və beynəlxalq əməkdaşlıq imkanları haqqında məlumat verib.
Səfərin məqsədi Türkiyə və İtaliya arasında müdafiə sənayesi sahəsində texnoloji əməkdaşlığın gücləndirilməsi və yeni ortaq layihələr üçün potensial imkanların müzakirəsi kimi qiymətləndirilir.
Baykar son illərdə yerli və milli müdafiə sənayesinin ən önəmli aktorlarından biri kimi, 30-dan çox ölkəyə ixrac etdiyi pilotsuz sistemlərlə beynəlxalq bazarda mühüm yer tutub.
