BAKI, AzerVoice, Nailə Babazadə
Türkiyənin ticarət naziri Ömər Bolat İordaniyanın paytaxtı Əmmanda İordaniya sənaye, ticarət və təchizat naziri Yarub əl-Qudat ilə birgə keçirilən Türkiyə–İordaniya Qarışıq İqtisadi Komissiyasının (KEK) iclasında iki ölkə arasında birinci dövr qarışıq iqtisadi komissiya üzrə Anlaşma Memorandumunun imzalandığını bildirib.
AzerVoice xəbər verir ki, Bolat qeyd edib ki, bu sənəd ticarətdən qarşılıqlı investisiyalara, tikinti layihələrindən kənd təsərrüfatına, səhiyyədən mədəniyyət və turizmə qədər bir çox sahədə əməkdaşlığı əhatə edən konkret və konstruktiv razılaşmaları özündə birləşdirir.
Nazir vurğulayıb ki, bu görüş uzun fasilədən sonra iqtisadi əlaqələrin, ticarət və investisiya fəaliyyətlərinin, eləcə də infrastruktur layihələrinin canlandırılması baxımından dönüş nöqtəsidir.
Bolat bildirib ki, qarşılıqlı görüşlər zamanı yeni layihələr və proqramların hazırlanması barədə razılıq əldə olunub. “Gələcək dövrdə sərbəst zonalar, kiçik və orta bizneslər, sənaye zonaları, standartlaşdırma, təhsil, səhiyyə, elmi tədqiqat və kənd təsərrüfatı sahələrində çoxsaylı razılaşmalar imzalanacaq,” – deyə o bildirib.
Nazir həmçinin Türkiyə və İordaniya iş adamlarının bir araya gəldiyi Türkiyə–İordaniya Dəyirmi Masa toplantısının və Biznes Forumunun keçirildiyini, gələcəkdə bu cür tədbirlərin daha da artırılacağını vurğulayıb.
Bolat əlavə edib ki, ötən il iki ölkə arasında ticarət dövriyyəsi 1,1 milyard ABŞ dollarını ötüb, cari ilin ilk doqquz ayında isə 1,5 milyard dollara yaxınlaşıb.
Nazir, həmçinin, Türkiyə və İordaniyanın Suriya, Qəzza və İordan çayının qərb sahilində yenidənqurma layihələrində əməkdaşlıq etməkdə qərarlı olduqlarını qeyd edib. O, 2024-cü ilin dekabrında Suriyada formalaşan yeni hökumətlə birlikdə Türkiyə və İordaniyanın tarixi Orta Şərq ticarət marşrutunu bərpa etmək istədiklərini vurğulayıb.
Bolatın sözlərinə görə, bu nəqliyyat koridorunun bərpası Avropadan Türkiyə–Suriya–İordaniya üzərindən Körfəz ölkələrinə, oradan isə yenidən Avropaya yükdaşıma və ticarət həcmini artıracaq.
Səfəri çərçivəsində Ömər Bolat, həmçinin, İordaniyanın Salt şəhərində yerləşən Türk Şəhidliyini ziyarət edib, Birinci Dünya Müharibəsində şəhid olan Osmanlı əsgərlərinin xatirəsini anıb.