BAKI, AzerVoice, Nailə Babazadə

Türkiyə Prezidenti Rəcəb Tayyib Ərdoğan və Küveyt Əmiri Şeyx Meşal əl-Əhməd əl-Cabir əs-Sabahın iştirakı ilə iki ölkə arasında 4 saziş imzalanıb.

AzerVoice xəbər verir ki, rəsmi səfər çərçivəsində Küveytə gələn və rəsmi mərasimlə qarşılanan Prezident Ərdoğan, Küveyt Əmiri əs-Sabah ilə təkbətək və nümayəndə heyətləri arasında görüşlər keçirib.

Ərdoğan Küveyt Əmiri əs-Sabaha Türkiyənin yerli elektrik avtomobili Toggu hədiyyə edib.

Bəyan Sarayında keçirilən görüşlərdən sonra iki ölkə arasında müxtəlif sazişlərin imzalanması mərasimi baş tutub.

Türkiyə ilə Küveyt arasında “Dəniz Daşımacılığı Sazişi”, həmçinin Türkiyə Nəqliyyat və İnfrastruktur Nazirliyi ilə Küveyt Daxili İşlər Nazirliyi arasında “Gəmiçilərin Sertifikatlarının Qarşılıqlı Tanınmasına dair Anlaşma Memorandumu” xarici işlər naziri Hakan Fidan və Küveytin Baş nazirinin birinci müavini, daxili işlər naziri Şeyx Fahad Yusuf Saud əs-Sabah tərəfindən imzalanıb.

Türkiyə ilə Küveyt arasında enerji sahəsində əməkdaşlığa dair anlaşma memorandumu isə Türkiyənin Enerji və Təbii Sərvətlər naziri Alparslan Bayraktar və Küveytin Elektrik, Su və Bərpa olunan Enerji naziri, Maliyyə naziri vəzifəsini icra edən, iqtisadi məsələlər və investisiyalara cavabdeh dövlət naziri Dr. Subaih Əbdüləziz Əbdülmohsen əl-Muhaizem tərəfindən imzalanıb.

Bundan başqa, Türkiyə Respublikasının Prezident Administrasiyasına bağlı İnvestisiya və Maliyyə İdarəsi ilə Küveytin Birbaşa İnvestisiyaları Təşviq İdarəsi (KDIPA) arasında birbaşa investisiyaların təşviqi sahəsində əməkdaşlığa dair anlaşma memorandumu imzalanıb. Sənədə Türkiyə tərəfdən idarənin rəhbəri Ahmet Burak Dağlıoğlu, Küveyt tərəfdən isə KDIPA-nın baş direktoru Şeyx Dr. Meşal Cabir əl-Əhməd əs-Sabah imza atıblar.