BAKI, AzerVoice, Orxan Qədirzadə
Türkiyəyə səfərdə olan Papa Leo XIV Ankarada Prezident Kompleksində keçirilən tədbirdə çıxışı zamanı bildirib ki, Türkiyə həm bu gün, həm də gələcəkdə Aralıq dənizi regionunun və bütün dünyanın formalaşmasında strateji rol oynayır.
Dövlət başçısı Rəcəb Tayyib Ərdoğana göstərilən qonaqpərvərliyə görə təşəkkür edən Papa ölkəyə səfərindən məmnunluğunu ifadə edib. O qeyd edib ki, Türkiyənin təbii gözəllikləri insanları “Yaradılışı qorumağa” çağırır, mədəni və mənəvi zənginliklər isə müxtəlif nəsillər, ənənələr və ideyalar birləşdikdə böyük sivilizasiyaların formalaşdığını xatırladır.
Papa XIV Leo deyib ki, bəşəriyyət tarixində uzunmüddətli münaqişələr olsa da, çətinliklər eyni zamanda “böyük keçmişə sahib olan bir xalq üçün fürsətdir”.
O, səfər loqosu kimi Çanaqqala körpüsünün seçilməsinin Türkiyənin xüsusi rolunu simvolizə etdiyini bildirib.
“Bu körpü Türkiyənin daxili müxtəlifliyini birləşdirir və ölkənin Asiya ilə Avropanı, Şərqlə Qərbi bağlayan strateji keçid olduğunu nümayiş etdirir.” - o deyib.
Papa qeyd edib ki, dünyada cəmiyyətlər getdikcə daha çox qütbləşir və ekstremal mövqelər arasında parçalanır. Onun sözlərinə görə, mərhum Papa Fransiskin “laqeydlik qlobalizasiyasına” qarşı çağırışları bu gün də aktuallığını saxlayır.
Texnologiyanın ədalətsizliyi azalda biləcəyini, lakin eyni zamanda dərinləşdirə də biləcəyini deyən Papa XIV Leo süni intellektin “insanlığın öz üstünlüklərini və qərəzlərini təkrarladığını” bildirib və bunun ciddi siyasi və beynəlxalq təfəkkür dəyişikliyi tələb etdiyini qeyd edib.
O əlavə edib ki, ailə ictimai həyatın mərkəzidir və “Türkiyə mədəniyyətində ailənin mövqeyi digər ölkələrlə müqayisədə daha güclüdür”. Papa həmçinin qadınların təhsil, mədəniyyət və siyasətdə artan rolunu vurğulayaraq bunun cəmiyyətin güclənməsinə mühüm töhfə olduğunu deyib.
Vatikan rəhbəri keçmiş papaların - VI Pavel (1967), II İohan Pavel (1979), Benedikt XVI (2006) və Fransiskin (2014) - Türkiyəyə səfərlərini xatırladaraq, bu ənənənin “dinlərarası dialoq və əməkdaşlıq iradəsinin göstəricisi” olduğunu qeyd edib.
Qlobal gərginliyin artdığını deyən Papa hazırki dönəmi “Papa Fransiskin adlandırdığı kimi, tədricən inkişaf edən üçüncü dünya müharibəsi riski” adlandırıb. O bildirib ki, bu dinamika insanlığın real problemlər — sülh, aclıqla mübarizə, səhiyyə, təhsil və ekoloji qorunma — üzərində diqqətini yayındırır.
Çıxışının sonunda o, Vatikanın insan inkişafına yönəlmiş məramlarla dövlətlərlə əməkdaşlığa hazır olduğunu bildirib və xalqları “həqiqət və dostluq içində birgə addımlamağa” dəvət edib.
Papa XIV Leo səfər çərçivəsində Prezident Ərdoğana Müqəddəs Məkanlara aid təsvirlərin yer aldığı xatirə medalı hədiyyə edib.