BAKI, AzerVoice, Fərid Mikayılov

Türkiyə Milli Kəşfiyyat Təşkilatı (MİT), İstanbul Baş Prokurorluğu və İstanbul Polis İdarəsinin Terrorla Mübarizə Şöbəsi ilə birgə həyata keçirilən əməliyyat nəticəsində İsrail gizli xidməti MOSSAD-a məlumat ötürən vəkil Tuğrulhan Dip tutulub.

AzerVoice xəbər verir ki, Dip İstanbulda keçirilən koordinasiyalı əməliyyat zamanı saxlanılıb.

Onun, daha əvvəl MOSSAD üçün casusluq etdiyi üçün həbs olunan Serkan Çiçəklə əməkdaşlıq etdiyi üzə çıxıb.

Araşdırmalar göstərib ki, Tuğrulhan Dip təkcə Serkan Çiçəklə deyil, MOSSAD-a işləyən başqa bir çox dedektivlərlə də əməkdaşlıq qurub. Onların arasında İsrailə casusluq fəaliyyətinə görə 19 il həbs cəzası alan Musa Kuş da olub.

İstintaq materiallarına əsasən, Dip dövlət reyestrindəki şəxsi məlumatları qanunsuz yolla əldə edərək maddi qazanc müqabilində dedektivlərə ötürüb. O, yaratdığı gizli sorğu sistemi vasitəsilə topladığı məlumatları pulla satıb.

Məlumata görə, həmin dedektivlər əldə etdikləri məlumatları MOSSAD-a təqdim edir və casusluq fəaliyyətlərində istifadə edirdilər.