BAKI,AzerVoice, Fərid Mikayılov
Türkiyənin ilk pilotsuz döyüş təyyarəsi kimi hazırlanmış Bayraktar KIZILELMA PT-4, uçuş test proqramı çərçivəsində həyata keçirilən aqressiv qalxma və manevr sınaqlarını uğurla tamamladı.
AzerVoice xəbər verir ki, Baykar Texnologiya tərəfindən tamamilə yerli imkanlarla inkişaf etdirilən KIZILELMA-nın son sınağı barədə məlumatı şirkətin İdarə Heyətinin sədri Selçuk Bayraktar sosial şəbəkə hesabında paylaşdığı görüntülərlə ictimaiyyətə açıqlayıb.
Bayraktar KIZILELMA layihəsinə 2021-ci ildə start verilib. İlk prototip — TC-ÖZB quyruq nömrəli KIZILELMA — 14 noyabr 2022-ci ildə istehsal xəttindən çıxaraq Çorlu AKINCI Uçuş Təlim və Sınaq Mərkəzinə gətirilib. Burada uğurla yer testlərini tamamladıqdan sonra təyyarə 14 dekabr 2022-ci ildə ilk uçuşunu həyata keçirib.
Cəmi bir il ərzində səmaya qalxan KIZILELMA, qısa zamanda beynəlxalq aviasiya tarixində mühüm hadisələrə imza atıb. TEKNOFEST 2023 çərçivəsində Bayraktar AKINCI PUA ilə formasiya uçuşu reallaşdıran KIZILELMA, 1 may 2023-cü ildə isə SOLOTÜRK F-16 qırıcısı və Türk Ulduzları F-5 qırıcıları ilə İstanbul səmalarında kol uçuşu edib. Bu, gələcək hava döyüş konsepsiyası üçün dönüş nöqtəsi kimi dəyərləndirilir.
2003-cü ildən bütün layihələrini öz vəsaiti ilə həyata keçirən Baykar, PUA istehsalında qlobal liderə çevrilib. Şirkət 2023-cü ildə 1,8 milyard dollarlıq ixracat həyata keçirərək Türkiyənin ən çox ixracat edən ilk 10 şirkəti sırasına daxil olub. 2024-cü ildə də uğurunu davam etdirən Baykar, gəlirlərinin 90 faizini ixracatdan əldə edərək növbəti dəfə 1,8 milyard dollarlıq satış rəqəminə çatıb.
Baykar, ardıcıl üç il — 2021, 2022 və 2023-də Türkiyənin müdafiə və aviasiya sənayesində ixracat lideri elan olunub. Şirkət, 2023-cü ildə sahənin ümumi ixracatının üçdə birini, 2024-cü ildə isə dörddə birini təkbaşına reallaşdıraraq Türkiyəni qlobal PUA bazarında lider mövqeyə daşıyıb.
