BAKI, AzerVoice, Səməd Əyyubov

Türkiyə prezidenti Rəcəb Tayyib Ərdoğan Çin Xalq Respublikasının sədri Si Cinpinlə görüş keçirib.

AzerVoice xəbər verir ki, görüşdə iki ölkə mövcud əməkdaşlıq və məsləhətləşmə mexanizmlərinin mütəmadi işlədilməsi barədə razılığa gəlib.

Ərdoğan Orta Dəhliz ilə Çinin “Kəmər və Yol” təşəbbüsünün uyğunlaşdırılması üçün birgə addımların əhəmiyyətini vurğulayıb. O, ikitərəfli ticarətin balanslı və davamlı inkişafı üçün sərmayələrin önəmini qeyd edib. Xüsusilə rəqəmsal texnologiyalar, enerji, səhiyyə və turizm sahələrinin böyük potensiala malik olduğunu bildirib. Prezident əlavə edib ki, bu çərçivədə Çin şirkətlərinin Türkiyədə sərmayə yatırmaları üçün əlaqələndirmənin artırılması faydalı olacaq.

Ərdoğan, həmçinin, Türkiyənin “Vahid Çin” siyasətinə dəstəyini bir daha təsdiqləyib və Ankara ilə Pekin arasındakı münasibətlərin strateji xarakter daşıdığını diqqətə çatdırıb.

Görüşdə tərəflər Qəzzadakı son durum, Ukrayna-Rusiya müharibəsi, Suriyanın yenidən qurulması istiqamətində atıla biləcək addımlar, eləcə də regional və qlobal məsələləri də müzakirə ediblər.

Qeyd edək ki, Rəcəb Tayyib Ərdoğan Şanxay Əməkdaşlıq Təşkilatının (ŞƏT) 25-ci Dövlət Başçıları Şurası Sammitində iştirak etmək üçün Çinə səfər edib.