BAKI, AzerVoice, Nərmin Ağayeva

Türkiyənin aparıcı müdafiə sənayesi şirkəti ASELSAN-ın sosial mediada “Böyük gün, 27 avqust” paylaşımı ilə diqqət çəkən mərasimə Türkiyə prezidenti Rəcəb Tayyib Ərdoğan da qatılacaq.

AzerVoice xəbər verir ki, Gölbaşı Kampusundakı Oğulbey obyektinin təməlqoyma mərasimi ilə yanaşı, 14 yeni obyektin açılışı baş tutacaq.

Ərdoğan mərasimdə Türkiyənin çox qatlı hava hücumundan müdafiə sistemi olan Polad Günbəz layihəsi ilə bağlı mühüm inkişafları elan edəcək.

Mərasimdə ASELSAN-ın Hisar və Qorkut kimi Polad Günbəz komponentlərinin təhvil verilməsi, həmçinin SİPER Ürün-1 Uzun Mənzilli Regional Hava və Raketdən Müdafiə Sisteminin Türkiyə Silahlı Qüvvələrinə çatdırılması gözlənilir. Polad Günbəz layihəsinin ən yüksək səviyyəsinə çatdığı və 2025-ci ildən etibarən mərhələli şəkildə istifadəyə veriləcəyi bildirilir.

Qeyd edək ki, 2024-cü ilin avqustunda istifadəyə başlayan Polad Günbəz, yerli və milli silah sistemləri, radarlar, elektro-optik məhsullar, rabitə modulları, komanda və idarəetmə stansiyaları ilə təchiz olunub. Layihə mühüm obyektlərin, hərbi hissələrin və şəhərlərin hava hücumlarından müdafiəsini təmin edir.