BAKI, AzerVoice, Fərid Mikayılov

Türkiyə Prezidenti Rəcəb Tayyib Ərdoğan Şimali Kipr Türk Respublikasında (KKTC) keçirilən prezident seçkilərində qalib gələn Respublikaçı Türk Partiyasının (CTP) sədri Tufan Ərhürmanı təbrik edib.

AzerVoice xəbər verir ki, Ərdoğan seçkilərin nəticələrinin həm Türkiyə, həm də region üçün xeyirli olmasını arzulayıb.

“Bu seçkilər KKTC-nin demokratik yetkinliyini bir daha ortaya qoydu və Türk Kiprli qardaşlarımızın iradəsini sandıqda əks etdirdi. Türkiyə, KKTC-nin suveren hüquq və maraqlarını Türk Kiprli xalqla birlikdə hər platformada müdafiə etməyə davam edəcək” — deyə Prezident qeyd edib.

KKTC Ali Seçki Şurasının açıqladığı qeyri-rəsmi nəticələrə əsasən, Tufan Ərhürman səslərin 62,76 faizini toplayara, Ersin Tatarı (35,81 faiz) məğlub edib.

Türkiyə vitse-prezidenti Cevdet Yılmaz seçkiləri yüksək qiymətləndirərək bildirib ki, bu nəticələr KKTC-nin dövlət və xalq olaraq siyasi yetkinliyini bir daha təsdiqlədi.

Türkiyə Xarici İşlər Nazirliyi də ayrıca bəyanatla Ərhürmanı təbrik edib.

Seçki nəticələrindən sonra çıxış edən Tufan Ərhürman, Kipr siyasəti ilə bağlı qərarların Türkiyə ilə məsləhətləşmədən qəbul edilməyəcəyini bəyan edib.

“Mənim dövrümdə Kipr məsələsinə dair heç bir qərar Türkiyə ilə məsləhətləşmədən verilməyəcək. Türkiyə–KKTC münasibətləri daha da güclənəcək və bu, mənim liderliyimin əsas missiyası olacaq” — deyə Ərhürmanı bildirib.