BAKI, AzerVoice, Fərid Mikayılov

ABŞ Prezidenti Donald Trampın vasitəçiliyi ilə əldə edilən Qəzza atəşkəsi risk altındadır, İsrail ordusu bölgədə hücumlarını davam etdirərək razılaşmanı dəfələrlə pozub.

AzerVoice xəbər verir ki, Qəzza Hökumətinin Media Ofisinin bəyanatına əsasən, İsrail ordusu atəşkəs razılaşmasını 80 dəfə pozub.

Bu hücumlar nəticəsində 97 fələstinli həyatını itirib, 230 nəfər isə yaralanıb. Hadisələr Qəzza zolağının müxtəlif ərazilərində, o cümlədən Rəfah keçid məntəqəsi yaxınlığında baş verib.

HƏMAS, İsrail rejimini atəşkəsin pozulmasında ittiham edib. Qruplaşma bildirib ki, oktyabrın 11-də qüvvəyə minən razılaşmanın cəmi bir gün sonra pozulması, İsrailin niyyətlərini açıq şəkildə göstərir.

Qeyd edək ki, ötən həftə Misirin Şarm əl-Şeyx şəhərində ABŞ Prezidenti Donald Tramp və Misir Prezidenti Əbdülfəttah əs-Sisinin həmsədrlik etdiyi konfransda “Qəzza sülh sazişi” imzalanmışdı. Görüşdə 20-dən artıq ölkənin liderləri və nümayəndələri iştirak etmişdi.

Bununla belə, İsrailin son 10 gündə həyata keçirdiyi hücumlar sazişin icrasını sual altına qoyub. Hücumlar bölgədə sülhün bərqərar olmasını çətinləşdirir və genosid xarakterli müharibənin yenidən alovlanması təhlükəsini artırır.

Qeyd edək ki, Qəzzada 2023-cü ilin oktyabrından bəri davam edən İsrail əməliyyatları nəticəsində 68 mindən çox fələstinli öldürülüb, 170 mindən artıq insan yaralanıb. BMT və beynəlxalq müşahidəçilər vəziyyəti “humanitar fəlakət” kimi qiymətləndirir.