BAKI, AzerVoice, Nailə Babazadə
Türkiyənin nəqliyyat naziri Abdulkadir Uraloğlu ölkədə dəmir yolu infrastrukturunun genişləndirilməsi və modernləşdirilməsi istiqamətində görülən işlər barədə məlumat verib. Onun sözlərinə görə, dəmir yolları 2026-cı ilə qədər 14 min 437 kilometrə çatacaq və bu sahədə aparılan layihələr Türkiyəni Avrasiyanın logistik supergücünə çevirməyi hədəfləyir.
AzerVoice xəbər verir ki, nazir bildirib ki, Cümhuriyyətin ilk illərində başlanan dəmir yolu inkişafına verilən fasilə artıq aradan qaldırılır.
“Biz Türkiyəni yalnız regional deyil, qlobal logistik şəbəkənin mərkəzinə çevirmək istəyirik. Məqsədimiz ölkəmizi beynəlxalq ticarətin ürəyinə yerləşdirərək, regional liderlikdən qlobal ticarət qovşağına yüksəltməkdir.”-deyə o bildirib.
Uraloğlu əlavə edib ki, ağıllı nəqliyyat sistemləri və rəqəmsal transformasiya layihələri sayəsində dəmir yollarında təhlükəsizlik və səmərəlilik səviyyəsi əhəmiyyətli dərəcədə artıb.
Nazirliyin məlumatına görə, 2026-cı ildə dəmir yolu uzunluğu 14 min 437 km, 2027-ci ildə 15 min 934 km, 2028-ci ildə isə 17 min 728 km olacaq və bu məqsədlə 2025-ci il üçün 377 milyard lirədən çox investisiya ayrılıb.
Eyni zamanda, sinyal sistemi ilə təchiz edilmiş xətlərin payı 2026-cı ildə 65 faiz, 2027-ci ildə 71 faiz, 2028-ci ildə isə 76 faizə çatdırılacaq.
Qeyd edək ki, hazırda Ankara–İzmir, Mersin–Gaziantep və İstanbul Hava Limanı–Halkalı yüksək standartlı dəmir yolu xətləri üzrə işlər davam edir. Nazir vurğulayıb ki, sənaye bölgələri, limanlar və logistika mərkəzləri bu yeni xətlərlə birləşdiriləcək.
Şəhərdaxili metro və relsli sistemlərin uzunluğu da artacaq. Mövcud 465,8 kilometrlik şəbəkənin uzunluğu gələn il 487,1 kilometrə, 2027-ci ildə isə 522,1 kilometrə çatdırılacaq.