BAKI, AzerVoice, Nailə Babazadə
Renault Clio ilin ilk 7 ayında ən çox satılan avtomobil olaraq siyahının başında qalmağa davam edir. Togg T10X isə elektrikli bazardakı liderliyinə əlavə olaraq ümumi satışlarda da zirvəyə doğru irəliləyir.
AzerVoice xəbər verir ki,Avtomobil Distribyutorları və Mobillik Dərnəyi (ODMD) məlumatlarına əsasən, bu ilin yanvar-iyul dövründə avtomobil satışları ötən ilin eyni dövrü ilə müqayisədə 6,68 faiz artaraq 572 min 198 ədədə çatıb. Yüngül ticari nəqliyyat vasitələrinin satışları isə 5,77 faiz artaraq 143 min 497 olub.
Türkiyədə avtomobil və yüngül ticari nəqliyyat vasitələrinin ümumi satışları eyni dövrdə 6,5 faiz artaraq 715 min 695-ə çatıb.
Yalnız iyul ayında avtomobil və yüngül ticari vasitə bazarı ötən ilin eyni ayına nisbətən 14,55 faiz artaraq 107 min 718 olub. Avtomobil satışları 14,71 faiz artaraq 84 min 195-ə, yüngül ticari vasitə satışları isə 13,96 faiz artaraq 23 min 523-ə çatıb.
Model üzrə baxıldıqda, ilin 7 ayında Türkiyədə ən çox satılan avtomobil Renault Clio olub (27 min 189 ədəd). Togg T10X 19 min 821 satışla ikinci, Renault Megane Sedan isə 19 min 230 ədəd satışla üçüncü yerdə qərarlaşıb.
Eyni dövrdə Togg T10X ötən il eyni dövrdə 14 min 248 satışla altıncı yerdə idi, bu il isə ikinci yerə yüksəlib. Satış artımı 39 faiz olaraq hesablanıb.
Bu müddətdə ən çox satılan dördüncü avtomobil 17 min 532 ədəd ilə BYD Seal U olub. Tesla Model Y 17 min 26 satışla beşinci, Toyota C-HR isə 14 min 91 satışla altıncı sırada qərarlaşıb. Tesla Model Y-nin satışları ötən ilin eyni dövrü ilə müqayisədə təxminən 5 qat artıb (ötən il 7 ayda 3 min 502 ədəd).
Bu ilki siyahı ilə ötən ilki müqayisə edildikdə elektrikli və hibrid avtomobillərin sayında nəzərəçarpacaq artım müşahidə olunub. Bu dövrdə siyahıya Tesla da daxil olub. Hibrid seqmentdə isə BYD Seal U və Toyota C-HR əlavə olunub. Beləliklə, siyahıda iki elektrikli və iki hibrid avtomobil yer alıb. Ötən il bu siyahıda yalnız Togg var idi.
2023-cü ilin iyul ayında Türkiyədə təxminən 1 milyard dollarlıq investisiya razılaşması imzalayan BYD-nin Seal U modeli üzrə satışları bu ilin yanvar-iyul dövründə ötən ilin eyni dövrünə görə təxminən 38 qat artıb. Ötən il 7 ayda bu modelin yalnız 456 ədədi satılmışdı.
BYD-nin təkcə Türkiyədə deyil, Avropadakı yüksəlişi də diqqət çəkir. BYD-nin tam elektrikli avtomobil satışları Avropada bu ilin aprel ayında illik müqayisədə 169 faiz artaraq 7 min 231-ə çatıb. Həmin dövrdə ABŞ mərkəzli Tesla-nın satışları 49 faiz azalaraq 7 min 99-a düşmüşdü.
JATO Dynamics-in məlumatına əsasən, ilin ilk yarısında BYD Avropada 41 min 270 satışla ən çox satılan 12-ci elektrikli avtomobil markası olub.