BAKI, Azervoice, Nərmin Ağayeva

Türkiyənin Enerji və Təbii Sərvətlər naziri Alparslan Bayraktar canlı yayımda Suriyaya gündəlik qaz tədarükünün davam etdiyini qeyd edib.

Azervoice xəbər verir ki, nazir açıqlamasında "Azərbaycan qazı Türkiyə vasitəsilə Suriyaya ötürülür. Tutumumuz 6 milyon kubmetrdir və hazırda gündəlik 3,4 milyon kubmetr qaz axını var." - deyə bildirib.

Bayraktar elektrik enerjisi istehlakı ilə bağlı da məlumat verib. Son dövrlərdə havaların isti keçməsi ilə kondisioner istifadəsinin artdığını, elektrik sisteminin 120,000 meqavat gücə malik olduğunu bildirib. İyulun 28-də 1,239 milyard kilovatlıq elektrik istehlakı rekordu qırılıb.

Nazir vurğulayıb ki, son iki ildə elektrik və təbii qaz üçün vətəndaşlara ümumilikdə 900 milyard lirəlik dəstək göstərilib və bu dəstək bu il də davam edəcək. Elektrik avtomobillərin artımı və yenilənə bilən enerji sahəsindəki investisiyalarla enerji təchizatının daha da gücləndirilməsi planlaşdırılır.

“Vətəndaşlarımızın enerji xərclərini aşağı saxlamağa çalışırıq və yaxın gələcəkdə elektrik enerjisinin kəsilməsi gözlənilmir.” - deyə Bayraktar əlavə edib.