BAKI, Azervoice, Nərmin Ağayeva

Türkiyə Xarici İşlər Nazirliyi İsrail Nazirlər Kabinetinin Qəzzanı işğal etmək qərarını sərt şəkildə qınayıb.

Azervoice xəbər verir ki, nazirlikdən verilən açıqlamada, “İsrailin bölgədəki ekspansionist və soyqırım siyasətinin yeni mərhələsini təşkil edən Qəzzada hərbi əməliyyatını genişləndirmək qərarını ən sərt şəkildə qınayırıq. Fələstinlilərə qarşı soyqırımını davam etdirmək və işğalı genişləndirmək üçün fundamentalist Netanyahu hökumətinin atdığı hər bir addım beynəlxalq sülh və təhlükəsizliyə ağır zərbə vurur və bölgədəki böhranı daha da dərinləşdirir.”- deyə bildirilib.

Bəyanatda həmçinin vurğulanıb ki, bölgədə sülh ancaq beynəlxalq hüququn aliliyi, diplomatiyanın üstünlüyü və fundamental insan hüquqlarının qorunması ilə mümkün olacaq. “Qəzzanı yaşanmaz hala gətirərək fələstinliləri öz torpaqlarından çıxarıblar” – deyə, açıqlamada qeyd olunub.

Qeyd edək ki, İsrail Təhlükəsizlik Kabineti Qəzza zolağının şimalında yerləşən Qəzza şəhərinin işğalı üçün yeni planı təsdiqləyib. Yerli mənbələr İsrail ordusunun bütün şəhəri ələ keçirmək üçün hazırlıqlara başladığını bildirir.