BAKI, Azervoice, Nərmin Ağayeva
Türk Hava Yolları (THY) İspaniyanın ikinci ən böyük hava yolu şirkəti Air Europa-da mühüm üstünlük əldə edib. Lufthansa-nın Air Europa sərmayəsindən çıxması ilə THY rəqiblərindən fərqlənərək strateji bazara daxil olmaq üçün əhəmiyyətli bir maneəni dəf edib.
Azervoice xəbər verir ki, Lufthansa sərmayə qoymamaq qərarını rəsmən açıqlayıb. Bu addım ilə THY Air Europa səhmləri üçün yeganə ciddi potensial alıcı olaraq qalır. İspaniya və Latın Amerikası bazarlarında güclənmək istəyən türk aviaşirkəti üçün bu, böyük fürsət yaratmış olur.
Əvvəl Fransa-Hollandiya müştərək müəssisəsi Air France-KLM də Air Europa payından imtina etmiş, Britaniyanın IAG qrupu isə tam ələ keçirmək üçün lazımi təsdiqi ala bilməmişdi.
Air Europa-nın Latın Amerikada 19 istiqamətə uçuşları var və THY bu tərəfdaşlıqla həm Pireney yarımadasında, həm də Cənubi Amerikada mövqeyini gücləndirəcək.
