BAKI, AzerVoice
Türkiyənin 51 vilayətində yanğınlarla mübarizəni Türkiyənin Fövqəladə Halların İdarəolunması Agentliyi (AFAD) aparacaq.
AzerVoice xəbər verir ki, bu barədə Türkiyə Prezidenti Rəcəb Tayyib Ərdoğan bildirib.
"4 247 yanğınla mübarizə apardıq. Son 9 ilin ən quraq dövrünü yaşayırıq. Yanğınsöndürmə xidməti böyükşəhər bələdiyyələrinin vəzifəsidir. 51 vilayətimizdə isə bu işi AFAD-la təşkil edəcəyik. AFAD bu işi ən güclü şəkildə planlayacaq. Təşkilatımız mövcud imkanlarını daha da gücləndirəcək və Türkiyənin harasında, hansı növ fəlakət baş verərsə versin, indiyə qədər olduğu kimi, bundan sonra da dərhal hadisə yerinə çatacaq" - deyə, Ərdoğan vurğulayıb.
Ərdoğan, həmçinin meşə yanğınları ilə mübarizə məsələsinə də diqqət çəkib.
"Meşələrimizi qorumaq üçün bütün tədbirləri görürük. Kənd və Meşə Təsərrüfatı Nazirliyi payızdan etibarən yanğına həssas vilayətlərimizdəki bütün kəndlərdə maarifləndirmə fəaliyyətləri həyata keçirib. Meşələrin təmizliyindən tutmuş baxımına qədər lazım olan bütün hazırlıqlar böyük diqqətlə yerinə yetirilib. Yeni texnika və avadanlıqların əlavə olunması ilə hava və quru donanmamız yanğınlara hazır vəziyyətə gətirilib. 27 təyyarə və 105 helikopter ölkə üzrə 65 nöqtədə, 6 minə yaxın quru vasitəmiz isə 1 600 nöqtədə yerləşdirilib. Meşə təsərrüfatımız 25 min yanğınsöndürən heyəti və ehtiyac olduqda dəstəyə gələn 132 min könüllüsü ilə mayın 1-dən etibarən fövqəladə vəziyyətinə keçmişdir" - deyə, Ərdoğan bildirib.
Qeyd edək ki, 2025-ci ilin iyun və iyul aylarında Türkiyədə baş verən meşə yanğınları ölkənin müxtəlif bölgələrində ciddi fəsadlara yol açmışdır. Bu yanğınlar, xüsusilə İzmir, Eskişehir, Sakarya, Bilecik, Manisa və Hatay vilayətlərində geniş əraziləri əhatə etmişdir.
İzmir vilayətində baş verən yanğınlar nəticəsində 50 mindən çox insan evakuasiya edilmiş, 200-dən çox ev və bir neçə iş yeri zərər görmüşdür. Yanğınların səbəbləri arasında yüksək temperatur, güclü külək və elektrik xətləri ilə bağlı nasazlıqlar göstərilir. Yanğınların söndürülməsi üçün mindən çox yanğınsöndürən, 100-dən çox yanğın maşını, 14 helikopter və 4 su tökən təyyarə istifadə edilmişdir.
Eskişehir vilayətində baş verən yanğın zamanı 10 nəfər həyatını itirmiş, 14 nəfər isə yaralanmışdır. Yanğınların güclü küləklə sürətlə yayılması nəticəsində bu faciə baş vermişdir. Həyatını itirənlər arasında 28 yaşlı bir meşə işçisi və 2023-cü ildə zəlzələ xilasetmə əməliyyatlarında iştirak etmiş bir AKUT könüllüsü də vardır.
Elm adamları qeyd edirlər ki, son illərdə iqlim dəyişikliyi nəticəsində Türkiyədə yanğın riski daşıyan günlərin sayı əhəmiyyətli dərəcədə artıb. 2025-ci ildə bir çox bölgədə eyni anda bir neçə yanğın baş verir ki, bu da yanğınsöndürmə qüvvələrinin yükünü ağırlaşdırıb.
