BAKI, AzerVoice
Türkiyə Xarici işlər naziri Hakan Fidan, Balkan Sülh Platformu Xarici İşlər Nazirləri Toplantısı çərçivəsində İstanbulda olan Bosniya və Herseqovina, Serbiya və Monteneqro xarici işlər nazirləri ilə görüşüb.
AzerVoice xəbər verir ki, Türkiyı Xarici İşlər Nazirliyinin X sosial media hesabında yayımlanan paylaşımda bildirilib ki, nazir Fidan İstanbulda Bosniya və Herseqovina xarici işlər naziri Elmedin Konakoviç, Serbiya xarici işlər naziri Marko Curiç və Monteneqronun baş nazir müavini və xarici işlər naziri Ervin İbrahimoviçlə ayrı-ayrılıqda görüşlər keçirib.
Türkiyənin təşəbbüsü ilə bəzi Balkan ölkələrinin iştirakı ilə yaradılan Balkan Sülh Platformasının ilk toplantısı İstanbulda keçirilir. Bu Platforma region ölkələri arasında dialoqu, qarşılıqlı etimadı və əməkdaşlığı artırmağı, regional problemlərə davamlı həll yolları tapmağı hədəfləyir.
Qeyd edək ki, Toplantı qeyri-rəsmi məsləhətləşmə formatında keçiriləcək və Hakan Fidan saat 19:00 radələrində mətbuat konfransı təşkil edəcək.
Toplantıda nazirin təhlükəsizlik risklərinin aradan qaldırılması və regional inteqrasiyanın gücləndirilməsi məsələlərinə diqqət yetirməsi gözlənilir.