BAKI, AzerVoice

Türkiyənin Milli Döyüş Təyyarəsi KAAN layihəsi çərçivəsində, Türkiyə və İndoneziya arasında 48 ədəd KAAN təyyarəsinin satışı ilə bağlı kommersiya müqaviləsi imzalanıb.

AzerVoice xəbər verir ki, müqavilə Türkiyə Müdafiə Sənayesi İdarəsinin təşəbbüsü və Türk Hava və Kosmos Sənayesi (TUSAŞ) tərəfindən hazırlanan layihə çərçivəsində həyata keçirilib.

İmzalanma mərasimində Türkiyə Müdafiə Sənayesi İdarəsinin sədri Haluk Görgün, İndoneziya Müdafiə naziri Sjafrie Sjamsoeddin, TUSAŞ İdarə Heyətinin sədri Ömer Cihad Vardan, Milli Müdafiə nazirinin müavini və TUSAŞ sədr müavini Şuay Alpay və TUSAŞ baş direktoru Mehmet Demiroğlu iştirak ediblər.

Mərasimdən sonra çıxış edən Müdafiə Sənayesi İdarəsinin sədri Haluk Görgün bu müqaviləni “tarixin içində tarixi bir an” adlandırıb və bildirib ki, bu əməkdaşlıq Rəcəb Tayyib Ərdoğan və İndoneziya Prezidenti Prabowo Subiantonun liderliyi və siyasi iradəsi ilə mümkün olub.

Görgün bildirib ki, 11 iyun 2025-ci il tarixində imzalanmış “Dövlətdən-dövlətə (G2G) Təchizat Sazişi” çərçivəsində bu kommersiya müqaviləsi, 48 ədəd KAAN təyyarəsinin İndoneziyaya tədarükünü və texniki detalları əhatə edir.

Əməkdaşlıq çərçivəsində İndoneziyada yerli sənaye infrastrukturu yaradılacaq, iki ölkə arasında istehsal və mühəndislik sahəsində əlaqələrin inkişaf etdirilməsi planlaşdırılır. Görgün, layihədə iştirak edəcək İndoneziya tərəfdaşları – başda PT RAD və PTDI olmaqla – bütün qurumlara təşəkkür edib və müqavilənin hər iki ölkə üçün faydalı olacağına ümid etdiyini bildirib.