BAKI, AzerVoice
İstanbul Böyükşəhər Bələdiyyəsinə qarşı aparılan korrupsiya istintaqı çərçivəsində İmamoğlunun da aralarında olduğu 105 nəfər həbs edilib.
AzerVoice xəbər verir ki, İstanbul Böyükşəhər Bələdiyyəsinə (İBB) qarşı aparılan korrupsiya istintaqı çərçivəsində, aralarında vəzifəsindən uzaqlaşdırılmış İBB sədri Əkrəm İmamoğlunun da olduğu 105 şübhəli həbs edilib, 215 nəfər barəsində isə məhkəmə nəzarəti tədbiri tətbiq olunub.
İBB-yə qarşı korrupsiya istintaqında şübhəli sayı 330-a yüksəlib.
İstanbul Baş Prokurorluğu tərəfindən Cümhuriyyət Xalq Partiyasında (CHP) yayılan “pul sayma” görüntüləri ilə bağlı aparılan istintaq çərçivəsində ifadə verən şahidlər bildiriblər ki, “İBB sədri Əkrəm İmamoğlu və bir sıra digər şəxslər iş adamlarını pul verməyə məcbur edib, bəzi iş adamları ilə birlikdə hərəkət edərək qanunsuz gəlir əldə ediblər, vasitəçi şəxslər üzərindən alış-satış əməliyyatları apararaq əldə etdikləri qanunsuz pulları yuyublar və pul köçürmələri zamanı 'gizli kassir' adlandırılan mülki şəxslərdən istifadə ediblər.”
HTS (telefon danışıqları və mesajlaşmalar), təhlükəsizlik kameralarının görüntüləri, MASAK (Maliyyə Cinayətlərinə Qarşı Mübarizə İdarəsi) hesabatları və 20-dən çox şahidin ifadəsi ilə yanaşı, İBB və ona bağlı iştirakçı şirkətlər tərəfindən açıq hava reklam sahələrinə dair keçirilən tenderlərdə, xidmət satınalmalarında və saxta müqavilələrdə qanun pozuntularının olduğu barədə Daxili İşlər Nazirliyinin müfəttişləri tərəfindən hazırlanmış hesabat əsasında İstanbul Baş Prokurorluğu tərəfindən aşağıdakı maddələr üzrə istintaq başladılıb.
Xatırladaq ki, Əkrəm İmamoğlu, 2025-ci il martın 23-də vəzifəsindən uzaqlaşdırılıb və “cinayətkar təşkilata rəhbərlik etmək”, “rüşvət alma” və “tender saxtakarlığı” ittihamları ilə həbs edilib. Bundan sonra müxtəlif tarixlərdə keçirilən yeddi əməliyyatda ümumilikdə 303 nəfər saxlanılıb.
İstintaq çərçivəsində bələdiyyəyə bağlı müxtəlif qurumların rəhbərləri və əməkdaşları, o cümlədən bələdiyyə şirkətləri rəhbərləri, mətbuat və reklam sahəsində çalışan şəxslər də saxlanılıb. Həmçinin İmamoğlunun yaxın çevrəsinə daxil olan şəxslər, o cümlədən mühafizəçiləri və şəxsi katibi də istintaqa cəlb edilib.
Cinayət işində adları keçən şəxslər arasında İBB-nin sabiq mətbuat və ictimaiyyətlə əlaqələr rəhbərləri, törəmə şirkətlərin direktorları və bir neçə keçmiş millət vəkili də yer alır. İstintaq çərçivəsində ifadə verərək 39 nəfər azadlığa buraxılıb.
Qeyd edək ki, 2023-cü ildə CHP-nin qərargahında yayılan pul sayma görüntüləri ilə əlaqəli başlanan istintaq çərçivəsində mart ayından bəri aparılan əməliyyatlarda İmamoğlu ilə yanaşı, Beylikdüzü və Böyükçekmece bələdiyyələrinin rəhbərləri və onların müavinləri də daxil olmaqla çox sayda şəxs barəsində istintaq davam edir. Hazırda hüquq-mühafizə orqanları əlavə 9 şübhəlinin tutulması istiqamətində əməliyyat tədbirlərini davam etdirir.