BAKI,AzerVoice, Orxan Qədirzadə
“Hizbullah”ın baş katibi Şeyx Naim Qasim bəyan edib ki, İsrailin davam edən hücumları və ABŞ-ın təzyiqləri fonunda Livanda sabitlik mümkün deyil.
Təşkilat rəhbəri çıxışı zamanı İsraillə əldə olunmuş atəşkəs razılaşmasının dəyişdirilməsi və yeni şərtlərlə əvəzlənməsi cəhdlərini qəti şəkildə rədd etdiyini bildirib.
“Əgər İsrail bir il əvvəl imzalanmış atəşkəs razılaşmasını yerinə yetirsə, o zaman ölkə daxilində müsbət və əməkdaşlıq mühitində milli dialoq mümkündür”, - deyə Qasim qeyd edib.
Hizbullah lideri ilk dəfə olaraq İsrailin Livanı tərk etməsinin danışıqlar və ya diplomatiya ilə deyil, məhz müqavimətin təzyiqi nəticəsində baş verdiyini vurğulayıb.
“İsrail Livanı nə diplomatiya, nə də razılaşma ilə tərk etdi. O, heç bir şərt qoyulmadan müqavimətin gücü ilə çıxmağa məcbur oldu”, - deyə Qasim bildirib.
Şeyx Naim Qasim “Ülül-bəs” əməliyyatına toxunaraq qeyd edib ki, “müqavimət böyük fədakarlıqlar göstərərək İsrailin məqsədlərinə çatmasının qarşısını alıb və işğal planlarını iflasa uğradıb”.
O əlavə edib ki, Livan ordusunun cənubda mövcudluğu milli qazancdır, çünki “müqavimət 42 il ərzində dövlətin müdafiə funksiyasını yerinə yetirib”.
Qasimə görə, İsrail hücum zamanı qarşısına qoyduğu hədəflərə nail ola bilmədiyi üçün məğlub olub və atəşkəs razılaşmasına əsasən cənubdan çıxmalıdır.
Hizbullah baş katibi bildirib ki, ABŞ və İsrail əldə edilən razılaşmanı Livan üçün üstünlük kimi təqdim edir və bu səbəbdən hökumətə güzəştlər üçün təzyiq göstərir:
“Hökumət yalnız ‘müqavimətin silahsızlaşdırılmasını’ gündəmə gətirir. Halbuki əsas məsələ milli suverenliyin bərpasıdır. Bunun üçün konkret plan hazırlanmalı və təhlükəsizlik qüvvələri onun icrasını təmin etməlidir”.
Naim Qasim həmçinin ABŞ emissarı Tom Brakın “Livan ordusunu müqavimətə qarşı silahlandırmaq istəyirik” bəyanatına sərt reaksiya verib.
O qeyd edib ki, İsrailin təcavüzü sonsuza qədər davam edə bilməz və hər şeyin bir həddi var.
“Atəşkəs razılaşması yalnız Litani çayının cənubuna aiddir. İsrail Livandan çıxmalı və əsirləri azad etməlidir”, - deyə Hizbullah lideri bildirib.
Çıxışının sonunda Qasim gərginliyin artmaması üçün çağırış edərək vurğulayıb ki, “şimaldakı İsrail yaşayış məntəqələrinə heç bir təhlükə yoxdur”.