BAKI,
AzerVoice
Terrordan azad Türkiyə hədəfinə çatmağa çox az qalıb.
AzerVoice xəbər verir ki, Prezident Rəcəb Tayyib Ərdoğan bu gün AK Partiya parlament qrupunun toplantısında çıxış edərək, şəhid əsgərləri ehtiramla andı və terrorla mübarizədə yeni mərhələyə daxil olunduğunu açıqlayıb.
Ərdoğan 12 türk əsgərinin şəhid olduğunu dərin hüznlə ifadə
edərək, onların fədakarlıqlarını yüksək qiymətləndirib.
O, həmçinin yaralı əsgərlərə tezliklə şəfa diləyərək, onların
səylərinin heç vaxt unudulmayacağını vurğulayıb.
Ərdoğan bildirib ki, “Terrordan azad Türkiyə” və “Terrordan azad bölgə” hədəflərinə doğru atılan addımlar sayəsində ölkədə sabitlik və birlik daha da güclənəcək. “Terror divarı yıxıldıqdan sonra türklər, kürdlər, ərəblər – bütün vətəndaşlarımız qalib olacaq,” – deyə o bildirib.
Prezident, DEM Partiyasının TBMM sədrinin müavini Pervin Buldan və Şanlıurfa millət vəkili Mithat Sancarla keçirdiyi görüşə toxunaraq, bu görüşlərin gələcəkdə müsbət nəticələr doğuracağına inandığını qeyd edib. “Tezliklə çoxdan gözlənilən tarixi xəbəri çatdıracağıq,” – deyən Ərdoğan, bu prosesin təxribatlara uymadan uğurla başa çatacağına ümid etdiyini vurğulayıb.
Qeyd edək ki, Ərdoğan çıxışında həmçinin MHP lideri Devlet Bahçeliyə verdiyi dəstəyə görə təşəkkür edib və dövlət birliyinin vacibliyini önə çəkib.
