BAKI, AzerVoice, Səməd Əyyubov
Günəşdə yüksək gücə malik alışma qeydə alınıb.
AzerVoice xəbər verir ki, bu barədə Rusiya Tətbiqi Geofizika İnstitutu məlumat yayıb.
Bildirilib ki, Bakı vaxtı ilə saat 18:16-da rentgen diapazonunda M1.1 sinfinə aid, 11 dəqiqə davam edən alışma baş verib. Rusiya Elmlər Akademiyasının Kosmik Tədqiqatlar İnstitutunun Günəş Astronomiyası laboratoriyası və Sibir bölməsinin Günəş Yer Fizikası İnstitutu həmin gün üçün alışma aktivliyinin artacağını, iri protuberansların qopması və Yerə təsir göstərə biləcək daha güclü alışmaların formalaşa biləcəyini proqnozlaşdırmışdı.
Məlumat üçün bildirək ki, Günəş alışmaları rentgen şüalanmasının gücünə görə beş sinfə bölünür: A, B, C, M və X. Ən aşağı A0.0 sinfi Yer orbitində kvadratmetr başına 10 nanovat gücündə şüalanmaya uyğun gəlir. Hər növbəti sinfə keçdikdə güc on dəfə artır. Bu cür alışmalar Günəş plazmasının atılması ilə müşayiət oluna bilər və plazma buludları Yerə çatdıqda maqnit qasırğaları yarada bilər.